Shillong, Jymmang 21
Ha kine ki khyndiat sngi ba la dep, ka la saphriang kawei ka party ha ki rynsan social media, na ka bynta ki Samla, kaba la tip kum ka ‘Cockroach Janta Party’ kaba la lah ban sakhi ïa ka jingkyrshan na kiba bun ki Samla na kylleng ka Ri India.
Ïa kane ka party la thaw thymmai da u Abhijeet Dipke, uba la don 30 snem ka rta, hadien ba la mih ka jingkren na u Chief Justice ka Supreme Court, myn ha ka 15 tarik u Jymmang (May) 2026, uba la khot ïa ki Samla ki bym donkam donjam kum ki ‘Niangkalaw’ lane ha ka ktien nongwei ‘Cockroach’ kiba trei ha ki kam bapher-bapher.
Ka jingmih kane ka party, la lah ban sakhi ïa ka jingsaphriang jong ka, ha ki bynta jong ka Ri India, kaba baroh ki Samla ki la ai ka jingkyrshan kaba pura.
U Chief Justice ka Supreme Court dangshen u la kynthoh ïa ki Samla ki bym donkam donjam, kiba la kylla long kum ki nongthoh khubor, ki nongwad RTI, ki nongleh social media bad kiwei-kiwei de. Kumta u Abhijeet Dipke u la thaw da ka party “Cockroach Janta Party” na ka bynta ki Samla ka Ri.
Kane ka website jong ka CJP, kaba la tip kum ka ‘Cockroach Janta Party’ ka la paw pyrthei ha ka 16 tarik u Jymmang hapoh ka jingthoh “Ka sur jong kiba jaituh & kiba khlem kam” ha kaba tang hapoh 48 kynta la palat ïa 40,000 ngut ki khun samla kiba la pynrung kyrteng ha kane ka seng CJP.
Kane ka seng ka la kam, ba ka la pynrung kyrteng palat 350 hajar ngut ki dkhot lyngba ki phorm online.
Ka jingïakhih ka la sdang ruh ha kiba bun ki bynta, ha kaba la ïohi ba ki samla trei mon sngewbha, ki la ïashim bynta ha ki jingpynkhuid ïa ki jaboh ha ryngkat bad ka riam da ki jaiñ, kiba long kum ki Niangkalaw.
Kane ka jingïakhih ka la sdang naduh ba la mih kane ka party CJP, kynthup ïa ka Bihar, Madhya Pradesh, Uttar Pradesh, Jammu and Kashmir, bad Himachal Pradesh. Bad mynta ruh ka la sdang sa ha kane ka Jylla Meghalaya, bad la don ruh ïa ka Instagram Page, kaba ki ai kum ka Cockroach Janta Party Meghalaya.
La sakhi ruh ba ki Samla na kylleng ka Ri, ki la don palat 17 million tam ngut, kiba la ïasnohkti ha ka Instagram Page jong ka CJP.
