Shillong, Jymmang 21
U Symbud Myntri Rangbah ka Jylla uba khmih ïa ka tnad Kam Pohïing, Bah Prestone Tynsong haba kyntait ïa ki jingkynnoh ba pyndonkam da ka bor, u la ong ba ka Sorkar kam don eiei ban buhrieh bad bthah ïa ki kynhun ba pyrshah ïa ka karkhana dewbilat ba kin pynsngew ïa ki jingpyrshah jong ki ha ka ‘public hearing’ kaba la buh ban long ha ka 22 tarik Jymmang.
“Sngewbha, kim dei ban sngewthuh bakla ba ka Sorkar kala leh da ka bor. Kaei kaba phi mut ban ong ba ngi la leh da ka bor?. Lada ngi la leh da ka bor, kan ym don satia wat ka ‘public hearing’. Ki kam kin jin da la ïaid beit shakhmat,” ong u Bah Prestone haba jubab ïa ki jingkylli ba ïadei bad ka jingïakhih pyrshah ïa ka ‘public hearing’ jong ka Shree Cement.
U Bah Prestone ha ka sngi Palei u la pynpaw ba u ïeng skhem ba ka jingpyrshah ïa ka ‘hearing’ dalade kala shah jop ïa ka jingthmu jong ka jingïasyllok paidbah.
“Ngi long kiba kloi ban ïakren. Haba don kano-kano ka jingsngewthuh bakla, ngi don beit hangne ban pynbeit ïa ki jingeh. Hynrei mynta kito ki briew kiba pyrshah ïa ka ‘public hearing’, nga tharai ka long kaba bakla. Kila leh bakla,” u la ong.
Haba batai ïa ka jingthmu, u Bah Prestone u la ong, “Haba ngi ong ‘public hearing’, ka dei kaei?, Ka dei kaba la pynlong ban tip ïa ka jingmut jong ki paidbah, ki kynhun ba don bynta, la ki kwah ne em ban don ïa ka karkhana dewbilat. Kane ka long kaba shai?”. U bynrap ba ka kyndon ka bthah ïa ka Meghalaya State Pollution Control Board ba kan pynlong ïa ka ‘hearing’.
“Kumta lada phi pyrshah ïa ka, leit sha ka ‘hearing’. Ka kyndon jong ka aiñ ka kren shai ba ka Pollution Control Board ka hap pynlong ïa ka ‘public hearing’,” u la ong.
U Bah Prestone u la buh jingkylli ruh ïa ka jingïakhih shabar jong ka ‘public hearing’. “Ngam sngewthuh balei ba ki leit ïakhih ha ophis u DC lane kiwei ki jaka. Balei ba kim leit sha ka ‘hearing’? Haba phi don ka jingsngewkhia, leit sha katei ka jaka. Ngi ïatrei kam haba shai,” u la ong.
“Nga kyrpad ïa kito kiba ïakhih, sngewbha wat ym sngewthuh bakla, sngewbha sngewthuh ïa kiei kiba donkam ban leh bad leit sha ka ‘public hearing’ bad pynsngew ïa ki jingpyrshah jong phi ha ka ‘public hearing’,” u la ong.
“Nga kwah ban pynshai sha kito ki bym kwah, kiba pyrshah, ba kin sngewbha ban ai ïa ki jingai jingmut ki jong ki ha ka ‘public hearing’. Ka dei na kata ka daw ba la pynkhreh ïa ka ‘public hearing’, na ka bynta ban ïoh lut baroh ki jingai jingmut halor kiba bun ki mat,” la ong u Bah Prestone.
