Shillong, Jymmang 21
Ka North East Students’ Organisation (NESO) ha ka sngi Palei ka la pynpaw ïa ka jingsngewkhia kaba jur halor ka jingïaibteng ka jingïakynad hapdeng ki Kuki bad ki Naga ha Manipur bad pynrem ïa ki jingthombor ïa ki riew paidbah.
Ban ïakren halor kane ka NESO ka la pynlong ïa ka jingïalang ha ka 20 tarik u Jymmang 2026 ha Guwahati ïa kaba la pynlong da ka All Assam Students’ Union (AASU).
Ka NESO ka ong ba ki jingïai jia ki jinghiar thma kynsan (ambush), ki jingpynïap, ki jingrahbor bad ki jingpyntieng pynsmiej ïa ki nongshong shnong ba lui-lui ka la wanrah ïa ka jinglong jingman kaba pynsyier bad ym don shuh ka jingsngew shngaiñ kumjuh ka shongsuk shongsaiñ ha ka thaiñ baroh kawei.
Ha ka kyrwoh ba la phah da u Chairman ka NESO u Bah Samuel B Jyrwa u la pynrem jur ïa ka jingïai jia ki kam pynïap bad jingthombor ïa ki nongshong shnong ba lui-lui, ba kynthup ki nongïalam niam, ka NESO ka la kyntu jur ruh na ka bynta ka “jingpynlait noh khlem kyndon ïa baroh ki briew ba shah rahbor kiba la set jubor” bad kyrpad ba “ym dei ban pynmong pynmynsaw ïa ki”.
Haba phai sha ka bynta jong ka Sorkar Pdeng, u Bah Samuel u la ong ba ka NESO ka pynpaw ka jingpynrem jur bad buh jingkylli ïa ka bynta jong ka Sorkar India halor ka jingbym leh eiei bad kynnoh ai ding pynban ha kane ka jingïakynad ba la neh slem bad kaba la ïaibteng ban shim ïa ka jingim jong ki briew ba lui-lui bad kaba la pynthud ïa ka thaiñ.
Shuh-shuh ka kyrwoh ka pynpaw ba bun ki briew ki la pyntip ba ki la jah rngai bad ym shym lap dien shuh ïa ki naduh ba jia ki jingthombor bad dawa ïa ka Sorkar ba kan shim ïa baroh ki sienjam kiba thikna ban lah lap dien shano ba ki don.
Ka jingïalang ka la wai da ka jingkyrpad ïa baroh ki Jaidbynriew bad ki kynhun ba don bynta ba kin kyntait ïa ki kam thombor bad pynphai mar kylliang, hynrei ban ïatreilang noh na ka bynta ban wanrah ïa ka jingsuk, ka jingbishar hok bad ka jingwanrah biang ïa ka jinglong jingman kaba jai-jai ha Manipur.
Kiba la ïa shimbynta ha kane ka jingïalang ki kynthup ïa ki nongmihkhmat na ka All Manipur Students’ Union (AMSU), All Arunachal Pradesh Students’ Union (AAPSU), Khasi Students’ Union (KSU), Mizo Zirlai Pawl (MZP), Garo Students’ Union (GSU) bad ka Naga Students’ Federation (NSF).
