Khliehriat, Jymmang 21
Ki nongshong shnong ka Elaka Nongkhlieh kiba kyrshan ïa ka Shree Cement Limited kiba don da ki hajar ngut ha ka 21 tarik Jymmang kila leit tur sha ka ophis u Deputy Commissioner East Jaiñtia Hills District ban kyrshan ïa ka Public Hearing kaba ïadei bad ka jingthmu tih mawshun jong katei ka company ha Lum Syrman, Elaka Nongkhlieh.
Ha kane ka jingleit tur, arngut ki rangbah kila mynsaw na ki bynta ka khlieh na ka jingshah tied lathi ha ki pulit. Kine kiba la mynsaw ki long u Local Director Ma Syrpailin Sukhlain bad Ma Albinus Langstang.
Kane ka jinghuri hura ka mih hadien ba ki paidbah nongkyrshan ki la pyrshang ban rung jubor shapoh ka phyllaw jong ka ophis u Deputy Commissioner.
Haba poi ha DC ophis kila shem ba ka khyrdop la khang khyrdep, bad kumta hi ki paidbah kila sdang ban khie bitar, bad kyrdem ïa ka khyrdop bad pynpra ïa ki ‘railing’ nar bad kiew ruh nalor kynroh ryngkat ka jingkawang maw sha ka liang ba don ki pulit.
Ha kane hi ka por ki pulit ruh kila sdang ban khyrwit naphang da kaba tied lathi ban nym ailad ban tur sha DC ophis.
Na ka liang ki nongïalam ka Elaka hapoh ka jingïalam u Dolloi Ma Na o-i Kyrmen Chooh Sukhlain, Secretary Ma Fencing Bareh bad Ma Forestar Pajuh haba pynshai sha ki paidbah ba kane ka jingpyni bor hapdeng ki nongkyrshan ka Shree Cement Limited bad ki pulit, ka dei tang ka jingïasngewthuh bakla namar ba ki bor pulit ki dang pyrkhat ba kane ka kynhun ka dei kaba wan na ka liang pyrshah.
Shwa kane, ki hajar ngut ki paid ka Elaka Nongkhlieh kiba kyrshan ïa ka Shree Cement Limited kila pynlong da ka jingïaid paidbah ne Rally ban pynpaw ïa ka jingkyrshan kaba pura ïa ka Public Hearing halor ka jingthmu tih mawshun da ka kompeni Shree Cement ha Lum Syrman, Elaka Nongkhlieh ka ban long ha ka 22 tarik Jymmang.
Kane ka jingïaid paidbah ka sdang na Shikilo ryngkat ka jingrah lang ïa ki placard bad ka jingpyrta ba kwah ïa ka roi ka par bad kyrshan ruh ïa ka Shree Cement Limited haduh ban da poi ha khyrdop ka ophis DC.
“Lada kiwei ki Elaka kila kiew, ka Elaka Nongkhlieh ruh ka donkam ïa ka jingkiew shaphrang ha ki liang baroh,” la ong ki nongïalam ka Elaka haba kren ha ka jingïalang kaba la long hakhmat u dur mot Woh Kiang Nangbah.
Ki nongïalam ka Elaka kila pynshai halor ka jingpdiang ïa ka Shree Cement Limited, ka long ban wanrah ïa ka roi ka par, ka ïoh kam ïoh jam ïa ki khun samla nalor kiwei ki lad pynroi.
Shwa kane u District Magistrate u la pynjari da ka section 163 jong ka BNS 2023 ban ym shah ïa ka jingïalum briew tawiar ka DC ophis.
Katba na ka liang u Member Secretary ka Meghalaya State Pollution Control Board (MSPCB) u Dr. GH. Chyrmang u la pyntip ka MSPCB bad ki bor District kim lah satia ban pynsangeh ïa ka Public Hearing na ka bynta ban khlong ïa u mawshun da ka Shree Cement Limited ha ka jaka kaba heh kumba 217 hecter ha Lum Syrman kaba la buh ban pynlong ha ka 22 tarik Jymmang.
