Shillong, Jymmang 21
Ka North Eastern Council (NEC) ka la mynjur ïa lai tylli ki projek ba heh ha Meghalaya kiba shongdor palat T.33.85 klur na bynta u snem 2025-26, kiba kynthup ïa ki jingtei ha ki jaka sor, ki kam pynroi ha ka liang ka seng kam seng jam, bad ka pule-puthi.
Ka sienjam ba kongsan ka long ban pynbeit biang ïa ki ‘pipe’ um bad ban pynitynnad ïa ka jaka sor ha shilynter jong ka surok ban leit sha ka Ïewduh ha Shillong.
Kane ka sienjam kaba la batai kum ka projek pynroi ba pura, ka thmu ban “pynbha ïa ka jingpynïaid kam, ka jingkhuid-jingsuba, ka jingbret ïa ki jaboh-jabaiñ ha ka rukom ba dei, ka bording, bad ka jingpynitynnad ïa ka jaka sor baroh kawei” kaba kaei ka NEC ka kdew “kawei na ki ïew tynrai ba heh tam ka Asia bad ka jaka pdeng jong ka kolshor bad ka khaïi-pateng jong ka Meghalaya.”
Ka Council ka la mynjur ruh ïa ka ‘Integrated Entrepreneurship and Livelihood Centre’ kaba thmu na bynta “ki samla ‘riewlum, ki kynthei nongseng kam, bad ki nongrep.”
Ka jaka ka long ban pynkhlaiñ ïa ki kam pynroi ha ka liang ki sap ki phong, ka seng kam seng jam, bad ka jingpynïasoh sha ki ïew ki hat, ban kyntiew ïa ka jingpynkupbor kaba kynthup lang ha ka ïoh ka kot ha kylleng ki shnong ki thaw.
Ha ka liang ka pule-puthi, ka NEC ka la kyrshan ban tei ïa ka skul R.K. Mission ha Sohra hapoh jong ka prokram ‘Focused Development of Deprived Areas’.
Ka projek ka thmu ban pynkhlaiñ ïa “ki jingtei ha ka pule-puthi ha kawei na ki thaiñ ba kongsan ha ka histori jong ka Meghalaya.”
Ki 3 tylli ki jingmynjur ha u snem 2025-26 ki kynthup ïa ki bynta kiba kongsan kum ki jingtei ha ki jaka sor, ka jingpynroi ïa ka seng kam seng jam, bad ka pule-puthi, la ong ka NEC.
Ka North Eastern Council ka treikam kum ka ‘Regional Planning Body’ na ka bynta ki 8 tylli ki Jylla ka Thaiñ Shatei Lam Mihngi hapoh jong ka tnad Development of North Eastern Region (DoNER).
