Shillong, Jymmang 21
U Deputy Commissioner ka East Jaiñtia Hills District, u Manish Kumar, IAS ha ryngkat u Bah GH Chyrmang, Member Secretary ka Meghalaya State Pollution Control Board (MSPCB), ki la mih shakhmat ban pyntip sha ki paidbah ba ka ‘Public Hearing’ ban khlong Mawshun ha Lum Syrman, Elaka Nongkhlieh ka ban long ha ka 22 tarik u Jymmang 2026 kan ïaid shakhmat ha ryngkat ka jingbud kyndon kiba la kdew da ka Court.
Kum ban shu kdew ba ka jingmudui sha High Court ka dei lyngba u Bah Bunlangki Sukhlaiñ lem 60 ngut kiwei-kiwei pat namar ka jingdon kiba pyrshah ban pynïaid shakhmat ïa katei ka ‘Public Hearing’ ha kaba ha ki ar sngi ba la dep la ïohi ïa ka jingtur ki paidbah sha ophis u DC East Jaiñtia Hills District.
Haba kren sha ki nongthoh khubor ha ka 21 tarik u Jymmang 2026, u Member Secretary lyngba ka jingmaitphang u Deputy Commissioner, u la ong ba kiei-kiei baroh la dep pynbiang lut katkum ki jingdonkam da ka Shree Cement Limited ban ïoh ïa ka jingtyrwa ban khlong mawshun.
Shuh-shuh u la batai bniah ruh halor ki jingsngewkhia da ki nongmudui sha ka Meghalaya High Court ha kaba ka la bthah ïa baroh kiba sngewkhia ban wan ïa shim bynta sha ka ‘Public Hearing’ da ka jingthmu ba suk ba shngaiñ.
Na ka liang u DC u la ong ban ym mih ki jingïakulmar ha ka jaka pynlong ïa ka ‘Public Hearing’ yn pynbiang ïa ki bor pahara ban pynlong ïa ka jingpeit bniah ïa ka jaka bad pan shuh-shuh ïa ki bor pahara na ka Sorkar.
