Shillong, Jymmang 22
Ka Election Commi-ssion of India (ECI) ha ka Sngi Thohdieng ka la pynmih ïa ka jingpynbna haba ïadei bad ka ilekshon sha ki 24 tylli ki ‘Seat’ jong ka Rajya Sabha ha ki 10 tylli ki Jylla.
Kine ki kynthup ïa ka Meghalaya, Andhra Pra-desh, Gujarat, Karna-taka, Madhya Pradesh, Rajasthan, Jharkhand, Arunachal Pradesh, Manipur bad Mizoram.
Ka jingthep bad jingñiew ïa ki ‘vote’ la pynbeit ban long ha ka 18 tarik Jylliew.
Ka jingpynlong ïa ka ilekshon ka long kaba donkam namarba ka samoi treikam jong ki 24 ngut ki dkhot jong ka ‘Council of States’ kan sa kut noh ha u bnai Jylliew-Naitung jong u snem 2026.
Ka Commission ka la ong ba ïa ki jingpynbna na ka bynta ka jingthep ‘vote’ yn sa pynmih ha ka 1 tarik Jylliew, ka ban sdang da ka jingthep kyrteng.
Ki kyrtong ki lah ban thep kyrteng haduh ka 8 tarik u Jylliew, bad ka jingkhmih bniah la pynbeit ha ka sngi kaba bud (9 tarik Jylliew). Ka tarik ba khatduh ban weng kyrtong ka long ha ka 11 tarik Jylliew.
Ka jingthep ‘vote’ kan long hapdeng ka por 9 baje mynstep haduh ka 4 baje janmiet jong ka 18 tarik Jylliew, bad ka jingñiew ïa ki ‘vote’ kan sdang naduh ka por 5 baje janmiet ha kane kajuh hi ka sngi.
Ïa kane ka kam ilekshon baroh kawei yn pyndep ha ka 20 tarik Jylliew, la ong ka ECI ha ka kyrwoh ba la soi da u Secretary, u Suman Kumar Das.
Ban pynneh ïa ka jinglong ryntih bad ban ïada na ka jingleh thok, ka Commission ka la bthah ba ki nongthep ‘vote’ ki dei ban pyndonkam tang da ki ‘sketch-pen’ rong ‘violet’ ba la kynthup lang ha ka jingpynbeit kyndon ba la buh lypa da u ‘Returning Officer’ na ka bynta ban buh dak ha ki ‘Ballot Paper’.
“Ym dei ban pyndonkam da kiwei pat ki khulom ban buh dak haba ïadei bad ki ilekshon ba la kdew haneng,” la ong ka ECI.
Shuh shuh ka Commission ka la ong ba yn sa shim ïa ki lad ki lynti kiba biang na ka bynta ban peitngor ïa ka jingïaid beit ïaid-ryntih jong ka ilekshon, kynthup ïa ka jingthung ïa ki nongpeit-pyrman, ban pyntikna ïa ka ilekshon kaba laitluid bad kaba hok.
