Shillong, Jymmang 22
Ki heh ophisar ha ka sngi Thohdieng ki la ïathuh ba ka Directorate of Revenue Intelligence (DRI) ka la ïoh ban kurup kumba 60,000 kilo u arecanuts (kwai) kiba wan na shabar ri ha ki ar tylli ki jingkhynra ha ka thaiñ Shatei Lam-Mihngi.
Ïa kine ki jingïoh ban kurup la leh da ka DRI’s Guwahati Zonal Unit ha Mizoram bad Assam hynnin ka sngi bad ha kaba sdang jong kane ka taïew. Ki don 5 ngut kiba la shah kem ha kaba ïadei bad kitei ki case haduh mynta.
“Da kaba leh mar mar katkum ki jingtip na ki tnad syntiat, ka DRI ka la pynlong ïa ki jingkhynra ha Mizoram bad Assam kaba la pynlong ïa kine ki jingïoh kurup,” ong ka tnad. Ha ka jingtohkit kaba nyngkong la lap ba ïa ki kwai ba la tyrkhong la pynpoi tuh sha India na Myanmar lyngba ka khappud Myanmar-Mizoram. Ha kawei na ki jingkhynra la ïarap ïa u DRI da ka kynhun shipai 38th Battalion jong ka Assam Rifles.
La ong ba “Ka jingwan rung be-aiñ jong u kwai na ka ri ba marjan ka wanrah ïa ka jingma kaba khraw ha ka liang ka ïoh ka kot ïa ki nongrep hapoh ka ri bad ka pynthut ïa ka jingshngaiñ ha ka liang ka ïoh ka kot ha ki thaiñ khappud.”
Ka DRI ka la pynjur ïa ka jingkhynra ha shi lynter ka khappud Indo-Myanmar ban khanglad ïa ka jingkhaïi tuh ïa ki mar khaïi beaiñ, kynthup ïa ki kwai, kiba ju wanrah bunsien ban lait na ka khajna.
