Mawkyrwat, Jymmang 22
Hadien ka jingpyndam noh ïa ka ‘Work Order’ ban tei ïa ka Market Complex ha Nativity Compound, Mawkyrwat katkum ka jingai jingmut u MDC ka Mawkyrwat ban tei ïa ka Market Complex bad ba la soi da u Chief Engineer ka KHADC, la ïoh jingtip ba la pyndam noh sa ïa ka ‘Work Order’ (WO) ban tei madan basketball ha Laitlawsang.
Ka Executive Committee (EC) jong ka Khasi Hills Autonomous District Council (KHADC) ba la ïalam da ka VPP ka la pyndam noh (cancelled) sa ïa ka ‘Work Order’ ba la ai sha ka South West Khasi Hills Basketball Associa -tion (SWKHBA) na ka bynta ban tei ïa ka madan ïalehkai Basket-ball ha Laitlawsang, Mawkyrwat bad ïa kane la leh katkum ka jingai jingmut jong u MDC ka Mawkyrwat, Bah Pynkhraw Kharjahrin uba long ruh u EM ka KHADC.
Katkum ka shithi ba la pynmih da ka KHADC lyngba u Chief Engineer dang shen kaba la saphriang ha ki rynsan ‘social media’ bapher bapher, ka Council ka la pyntip sha ka South West Khasi Hills Basketball Association (SWKHBA) lyngba u Bah Pascal Snaitang, dkhot ka SWKHBA ba ka la pyndam noh ïa ka ‘Work Order’ NO.DC.DEV.XX/269/24/6/152 ba la pynmih ha ka 15 tarik u Kyllalyngkot, 2025 katkum ka “jingai jingmut” jong u MDC jong ka thaiñ.
Haba kylli halor katei ka jingshah pynduh noh ka ‘Work Order’, u Bah Pascal Snaitang uba long mynta u Treasurer ka SWKHBA u la pyntip ba ka long kaba shisha ba ka KHADC ka la pyndam noh ïa ka ‘Work Order’, bad ka Council ka la kdew shai ha katei ka shithi ba ka la leh ïa kane da ka jingai jingmut jong u MDC ka thaiñ.
U Bah Pascal u la pyntip ruh ba hadien ba la ïoh ïa ka ‘Work Order’, ka Association ka la ïakynduh ïa ki ophisar bad kumjuh ïa u EM ba dei peit da kaba kyrpad ïa ki ba kin phah ïa ki ophisar ban wan kdew ne pyni khnang ba kin ïoh ban sdang noh ïa ka jingtrei ban shna ïa katei ka madan Basketball, hynrei na ka liang ka KHADC ha kaba nyngkong ka la pyntip ba ka don ka jingeh namar ka jingthut ha ka portal, hynrei hadien pat ki la ai ki daw da kumne da kumtai bad dang shen ki la ïoh syndon da ka shithi ba la pyndam noh ïa katei ka ‘Work Order’ khlem da pynshai ïa ka daw.
Lah ban kdew hangne ba kane ka jingpyndam noh jong ka KHADC ïa ki ‘Work Order’ hapoh jong ka Mawkyrwat Constituency halor ka jingai jingmut jong u MDC ka la dei ka sien kaba ar, bad ka sien kaba nyngkong ka dei ka jingpyndam noh ïa ka ‘Work Order’ ban tei ïa ka Market Complex ha Nativity Compound, Mawkyrwat kaba ïa ka ‘Work Order’ la aiti sha ka Nativity Development Committee, Mawkyrwat.
