Shillong, Jymmang 22
Ka Khasi Hills Autonomous District Councl (KHADC) ha ka sngi ka 22 tarik u Jymmang 2026, ka la pyllait paidbah ïa ka kot lyngkdop, kaba pynshai bad batai ïa ki paidbah ba kin sngewthuh, kumno ban siew ïa ka khajna ne ka Professional tax.
Ïa kane ka kot lyngkdop la pyllait paidbah da u Bah Shemborlang Rynjah, u Chief Executive Member (CEM) barim ka KHADC, ha ryngkat ka jingdonlang u MDC ka Mawkynrew, u Bah Seibor Warbah, Executive Member ka tnad Finance, Taxation bad Forest, ki nongtrei ka Taxation ha Council bad kiwei kiwei de.
Kane ka kot lyngkdop ka batai, ïa kino kiba dei ban siew ïa ka professional tax, kumno ban pynrung kyrteng bad katno dei ban siew katkum ka jingïoh jong ki ha ka shisnem, ryngkat bad kiwei de ki jingbatai.
Haba kren ha kane ka sngi, u Bah Seiborlang Warbah, EM ba khmih ïa ka Taxation u la ong, ba hashuwa ban shim ïa kane ka rai, la ïamir jingmut naduh ba dang long CEM u Bah Shemborlang Rynjah ryngkat ki nongtrei ka tnad Taxation ha KHADC.
“Kumta mynta ngi la ïoh ban pyllait ïa kane ka kot lyngkdop, kaba batai kumno ban siew ïa ka professional tax, khnang ba ki paidbah kin sngewthuh.”
“Ngi kwah ba ka tnad Taxation hapoh District Council kan kiew. Kane ka kot lyngkdop kan long ka jingïarap na ka bynta ki paidbah, ba kin sngewthuh haba ïadei bad ka khajna,” u la ong.
U Bah Seibor u la kyntu ïa ki paidbah, ba kin sngewbha ban weng ïa ka mynsiem ban ong “Kane ka khajna kadei kaba la shu leh donbor” hynrei ka jingdonkam ka long, ba lada ki paidbah ki ieid ïa kane ka Council, sngewbha ban ai ka jingkyrshan, da kaba bynrap “Lyngba ka jingkyrshan jong ki paidbah ka Council kan kiew haba ïadei bad ka khajna”.
Shuh shuh u la kdew ruh, ba ka Professional tax kaba heh tam ban siew ha ka shisnem ruh ka dang poi tang kumba 2,500 bad lada pynwan ha ka shisngi ka dangshong tang kumba 6 tyngka 84 naïa, kumta ki paidbah kidei ban siew ïa ka khajna, kaba long kum shibynta ka jingkyrshan ïa ka District Council.
Na ka liang u Bah Shemborlang Rynjah, CEM barim ka KHADC u la kyntu ïa ki nongtrei ka Taxation, ba kin ai jingmut lem, kin pyni lynti lem ïa kaei kaba ki shem ki ïakynduh, kumno ban nang pynbha shuh-shuh ïa ka rukom treikam jong kane ka tnad ha ka Council.
“Phim dei ban sheptieng ïa kiba shong ha ka shuki, phi dei ban long kiba kylluid ha ka rukom pyrkhat jong phi, namar ka jingnoh synñiang jong phi tang iwei i symboh pyrkhat ruh na ka bynta ban pyntip sha u EM ne sha u CEM, kin ïoh ban ïa pyrkhat bad ïamir jingmut halor kata,” la ong u Bah Shemborlang.
