Shillong, Jymmang 22
U Bah Tarcisious Mawlot uba dei u rangbah na ka thaiñ Mairang, u la pynpaw ka jingsngewkhia ba ka Sorkar Pdeng haduh mynta ka dang don ka jingangnud ban tih ïa u marpoh khyndew Uranium ha Domiasiat kaba hap ha ka South West Khasi Hills District.
Haba kren sha ki nongthoh khubor u Bah Tarcisious u la ong ba ka jingkwah ka Sorkar ban tih ïa u Uranium ha Domiasiat, kam pat sangeh bad shisien ka sngi kan sa leh da ka bor ban ïoh tih ïa u Uranium.
Halor kane u la ong watla ki la don ki jingïakhih bad watla ki paidbah ki pyrshah namar ka jingsheptieng ïa ki jingma ki ban ktah ïa ka lyer, ki mrad, ka um bad kan ktah ïa ka koit ka khiah baroh kawei.
U la ong ba ka jingsngewkhia jong u ka mih hadien ba u ïohi ba ka Sorkar ka la pynlut shibun bah ka pisa ha ka ban shna ïa ki surok barit naduh na Wahkaji-Guwahati (Chaigoan) shaduh Nongstoiñ-Rambrai.
“Kine ki dei ki shnong barit hynrei ka jingpynlut pisa ka Sorkar ka long kaba jur” u la ong bad bynrap ba kane ka pyni dak ba kan sa tih ïa u Uranium ha kawei ka sngi bad ha kata ka por yn ym lah ban khang shuh.
Haba ïadei bad kane u la ïathuh ba u la leit ban ïakynduh ïa u Myntri Rangbah ka Jylla u Conrad K Sangma ha 13 tarik Jymmang 2026 ban ai jingmut ba ka Sorkar kan thaw ïa ka polisi ban phah pule pyntbit ïa ki samla ïa ka sobjek kaba ïadei bad u Uranium, khnang ba lada don ki briew lajong kiba trei ha ki kompeni kiba pyntrei ïa kane ka kam kan long ka jingshngaiñ ïa ka ri bad ka jaitbynriew.
U la pynpaw ba u la leit ban ai jingmut ïa u Myntri Rangbah barim ka Jylla u (L) Salseng Chada Marak hynrei u khlem patiaw ïa ka jingai jingmut jong u, “Jin lada ka Sorkar ha kito ki por ka la thaw ïa ki polisi, khlem pep ki la mih ki riewstad haba ïadei u Uranium” u la ong.
