Shillong, Jymmang 22
U President ka United Democratic Party (UDP), u Bah Metbah Lyngdoh ha ka sngi Thohdieng jong ka taïew, u la kyntait ïa ka jingïakren ban mih noh u MLA ka Mawkyrwat u Bah Renikton Lyngdoh Tongkhar na ka party, ban pynïasoh sha ka National People’s Party, da kaba pynskhem ba kam don kano-kano ka dak kaba pyni ba une u nongmihkhmat un mih noh na ka party.
Ka jingkynthoh halor kane ka jingleh jong u Bah Renikton Tongkhar, ka la mih hadien ba katto katne ngut ki nongkyrshan jong u, ki la pynïasoh bad ka NPP dang shen, u la ong.
“Ki nongkyrshan ki laitluid ban phet na kawei ka party sha kawei pat, na ka A sha ka B sha ka C, hynrei ki nongmihkhmat (MLA), kim lah namar ki shah teh ha ka aiñ,” la ong u Bah Metbah haba kren sha ki nongthoh khubor.
U ong “Kumba ka long mynta kam don ei-ei kaba pynpaw ba u Bah Renikton un mih noh na ka party.”
U Bah Metbah u la ong ba u la ju ïakynduh man ka por bad u MLA ka Mawkyrwat. “Nga ju ïakynduh ïa u man ka por. U la kren shai ba um mih na ka seng kumba long mynta”.
Halor ka jingphet seng jong ki nongkyrshan, u la ong ba ka UDP ka la bthah ïa ki unit jong ka, ban bishar bniah ïa ka jinglong jingman.
“Ha ka UDP ngi ngeit skhem ba ki paidbah kiba don ha ki shnong ki thaw, kidei kiba kongsan bha. Bad dei halor kane ba ka UDP ka ngeit, haba u MLA u thmu ban pynïasoh bad kawei pat ka party, kaba kongsan ka long ban pyntip shuwa sha ki nongkyrshan,” la ong u Bah Metbah.
“Ngi la bthah ïa ki nongïalam jong ngi ha Mawkyrwat, ba kin peit bniah ïa kane ka kam bad ban ai jingtip lada ki donkam ïa kano-kano ka jingkyrshan na ka party,” u la ong.
Halor ka jinglong nongïalam jong u hi, u la bynrap, “Nga sngewkmen ba la ithuh ïa ka jinglong nongïalam jong nga. Kata ka pynbor ïa nga ban nang kiew. U nongïalam u dei ban sngap kham bun, ban ïa kaba kren”.
“Ki jingai jingmut, ka jingpeit bniah, baroh kidei ki bynta jong ka rukom ba phin kiew, ym tang kum u nongïalam saiñ hima sima, hynrei ha ka jingim ruh,” u la ong.
