Shillong, Jymmang 22
Ka Synjuk Nongsynshar Shnong Upper Shillong ha ka sngi Thohdieng ki la leit ban ïakynduh ïa u Symbud Myntri Rangbah ka Jylla u Bah Prestone Tynsong ban ai jingmut ban pynlong ka jingjurip haba ïadei kiba bun ki jingtrei kiba dang ïaid ha ka thaiñ, ba kynthup ban ïoh noh ïa ka Police Station ha ka jaka jong ka jingkieng Umshyrpi barim.
Haba kren sha ki nongthoh khubor u Bah Arjun Dkhar Executive Member (SNSUP) u la ïathuh ba ka jingïakynduh ka long kaba sngewtynnad watla kam don kano-kano ka jingkular kaba skhem na u Symbud Myntri Rangbah ka Sorkar Jylla.
U la ïathuh ba ki la ïoh ban pynpaw haba ïadei ka lynti jong ka MeECL, ki kam jngohkai, ka College, ki umbam umdih bad kiba bun ki kam pynroi kiba hap hapoh ki shnong ki thaw jong ka thaiñ Upper Shillong.
U la ïathuh ba ka jingdawa ban ïoh noh ïa ka Police Station ka la dei ka mat kaba ki nongsynshar shnong ki la ju pynsngew la kham slem, kaba long kum shi bynta ban ai ka jingshngaiñ ïa ki paidbah ka shnong ka thaw ha kaba na ka liang u Symbud Myntri Rangbah u la ong ba un sa buh ïa ka por ban pynlong ïa ka jingjurip.
“Ngi donkam ban wanrah ïa ka Police Station ha jingkieng Umshyrpi barim ban wanrah ïa ka shongsuk shongsaiñ namar kumba ïohi, ki la don ki jingjia ba ki khynnah jong ngi ki la ngat, kumta kum ki rangbah ngi don ka jingkitkhlieh” u la ong.
