Khliehriat, Jymmang 22
Ka bor synshar district jong ka East Jaiñtia Hills ha ka 22 tarik Jymmang ka la pynsangeh noh ïa ka jingpynsngew paidbah ne ‘public hearing’ hadien ba baroh ar tylli ki kynhun kiba la ïa lumlang ha katei ka jaka kim shym la ailad ba ka ‘public hearing’ kan ïaid shakhmat.
Ïa kane ka jingpynsngew paidbah la pynlong da ka Meghalaya State Pollution Control Board (MSPCB) halor ka jingtyrwa jong ka Shree Cement Limited ban khlong ïa u mawshun ha ka jaka kaba heh 217.394 hecter ha Lum Syrman kaba hap hapoh ka Elaka Nongkhlieh.
Ki sengbhalang kum ka JNC, JSU, KSU bad kiwei kiwei kila pynpaw ïa ki jingpyrshah kaba jur bad kaba tyngeh haba kila ïaid paidbah ha nongbah Shillong bad kila leit tur sha ophis u DC ha Khliehriat ban dawa pynduh pyndam ïa katei ka ‘public hearing’ namar ka jingdie jaka beaiñ bad ka jingpynkheiñ ïa ka Meghalaya Transfer of Land Regulations Act, 1971.
Ha ka step jong ka 22 tarik Jymmang, ki briew ki bym lah ban tip, kila pakhang lynti da kawei ka trok ‘four-wheel’ kaba don ïa u number ML04-B-2910, khnang ban nym ailad ïa kiba ban wan tur sha ka jingïalang pynsngew paidbah, hynrei kala shah thang noh ha ki briew ki bym lah ban tip.
Ynda ka ‘public hearing’ kala sdang, u Deputy Commissioner jong ka East Jaiñtia Hills District Manish Kumar, IAS u la shimti kum u shongknor ban pynïaid ïa ka jingïalang pynsngew paidbah hynrei na baroh arliang ki paidbah kim shym la ailad ba ka ‘public hearing’ kan ïaid shakhmat.
Kumta da kaba pyrkhat ïa ka shongsuk shongsaiñ hapoh ka thaiñ, u DC u la pynbna ba la pynsangeh noh ïa ka ‘public hearing’, da kaba u kyntu ruh ïa ki paidbah ban pynneh ïa ka shongsuk shongsaiñ ha ka thaiñ.
Katba na ka liang ka Meghalaya State Pollution Control Board kala ong ba ïa mynta kan shong pyrkhat shwa, lano ban pynlong biang ïa ka ‘public hearing’ da kaba ïaid katkum ki kyndon ka aiñ.
Shwa kane, kiba bun ki paidbah bad ki sengbhalang bapher bapher kiba wan sha ka ‘public hearing’ kila pynsngew ïa ki jinglap jingshem ba ki hap ban mad ha lynter surok haduh ban da poi ha jaka pynlong ‘public hearing’. Kila ong ba ha lynti kila shah kah da ka trok ‘four wheel’, ki mawbah kumjuh ki diengbah bad kala don ruh ka jingshah lun maw, ka shah siat jri siat sim haduh ba la don ruh kiba mynsaw.
Haba kren bad u Superintendent of Police ka East Jaiñtia Hills District u Pankaj Kumar Rasgania u la pynthikna ba ka jinglong jingman bad ka suk ka sain mynta ka la don hapoh ka jingpynïaid. “Kumba long mynta, ka long kaba suk bad ki paidbah ruh ki la ïapra noh da kaba suk naduh ba la pynsangeh noh ïa ka public hearing”.
Halor ka jingshah thang kawei ka trok, u la pyntip ba na ka liang ki pulit kim pat lah ban ithuh ïa ki briew kiba donkti ne ïa u trai jong katei ka kali. “Ngi dang hap ban pynthikna mano ba dei ki kynhun runar bad ka dei ka trok jongno”, la ong u Rasgania.
