Shillong, Jymmang 22
Ka Executive Committee (EC) jong ka Voice of the People Party (VPP) ha Khasi Hills Autonomous District Council (KHADC) ka la sospon ïa u Paiem Ainam Manik Syiem kum u Syiem jong ka Hima Mylliem bad ha kaba ka la thung ïa u Bah Alban Fedrick Syiem kum u Acting Syiem ban pynïaid shipor ïa ki kam jong ka Hima.
Ha ka ‘Notification’ kaba la pynmih da u Secretary jong ka KHADC ha ka sngi Thohdieng la ong ba la shim ïa kane ka kam katkum ka bor jong ka Section 7 jong ka Khasi Hills Autonomous District (Appointment and Succession of Syiem, Deputy Syiem, Electors and Rangbah Shnong Syiemship) Act, 2007.
“Da kane la pyntip sha baroh kawei ka Hima Mylliem ba ka Executive Committee jong ka Khasi Hills Autonomous District Council, da ka hukum kaba la pynmih ha ka 22 tarik Jymmang, 2026, ka la sospon ïa u Paiem Ainam Manik Syiem kum u Syiem jong ka Hima Mylliem,” la ong ka ‘notification’ ba la pynmih.
“Ha kaba ïadei bad kane, la thung ïa u Bah Alban Fedrick Syiem kum u Acting Syiem jong ka Hima Mylliem ban pynïaid ïa ki kam jong ka Hima,” la ong ka hukum.
Kane ka hukum kan treikam mardor bad kan ïai neh tad ynda la pynmih da kawei pat ka jingpynbna.
Katkum ka hukum ba la soi da u Bah Seiborlang Warbah, Executive Member ba peit ïa ka tnad Finance bad u Bah Denzil R. Chen, Executive Member ba peit ïa ka tnad Elaka Administration, la ong ba wat hadien ki Demand Notice kiba la pynmih naduh u snem 2022 haduh 2025, u Pa’iem Ainam Manik Syiem u la phiel ban siew ïa ka 10 percent na ka gross income jong ka Hima sha ka District Council na ka bynta ki snem mang tyngka 2022-23, 2023-24 bad 2024-25 katkum ka Section 11(5) jong ka Khasi Hills Establishment, Management and Control of Markets Regulation Act, 1979.
Ka hukum ka kdew ruh ba u Syiem u la pan jingbit na ka Council lyngba ka shithi 19 tarik Nohprah 2024 ban lum khajna na ki 5 tylli ki ïew jong ka Hima na ka bynta u snem 2025-26 hynrei hadien ba um shym la lah ban siew ïa ka 10 percent market share, ka jingbit kaba la ai ha ka 20 tarik Nohprah 2024 la pyndam noh lyngba ka shithi tarik 28 tarik Lber 2025.
Shuh shuh, ka District Council ka la kyntait ïa ka jubab jong u Syiem halor ka jingbym siew ïa ka 10 percent market share bad hadien kata la ai ruh ïa ki show cause notice bapher-bapher ha kaba u Syiem u la kular ban siew hynrei um shym la lah ban pyndep.
Ka hukum ka kdew ruh ba ka Council ka la dawa ïa ka outstanding 1 by 8 bynta kaba kot sha ka 3 hajar 24 klur 85 lak 20 hajar 625 tyngka eiei na ka bynta ki snem mang tyngka naduh 2018-19 haduh 2024-25 katkum ka kyndon jong ka sanad.
Ha ka ‘personal hearing’ kaba la long ha ka 5 tarik Rymphang 2026, la ong ba ki record ki pyni ba ka jingïoh lum pisa jong ka Hima ha uwei u snem mang tyngka ka la kot sha kumba 3 klur tyngka. Hynrei haba ka jingkyrpad ban bhah ïa ka 10 percent market share na ka 1 by 8 share la kyntait namar ym shah da ka aiñ, u Syiem u la kular ban siew hynrei hadien kata u la kyntait lyngba ka shithi tarik 24 tarik Lber 2026.
Ka Council ka la ong ruh ba ka ‘exemption letter’ tarik 19 tarik Nohprah 2024 bad ka ‘complaint letter’ tarik 11 tarik Rymphang 2026 ki la shah weng noh namar ki bynta aiñ kiba don jingduna.
Halor kine baroh, ka Executive Committee ka la ong ba ki kam jong u Syiem ki long pyrshah ïa ki Act, ki Regulation bad ki kyndon jong ka sanad bad ki pynpaw ruh ïa ka jingpyndonkam bakla ïa ka pisa paidbah kaba dei ka 10 percent market share bad ka 1 by 8 share.
Namarkata, ka ‘competent authority’ ka la sospon ïa u Pa’iem Ainam Manik Syiem haduh ban da dep ka jingtohkit la hukum ruh ïa u ban aiti mardor ïa ki kot ki sla bad ka ophis sha u Acting Syiem.
