Shillong, Jymmang 22
Ka Sorkar Jylla ka la rai ban pynkynriah noh ïa ki nongdie jingdie ha ki lynti ïaid (Right of Way) kiba don harud ka surokbah Shillong-Dawki kaba dang shu shna thymmai, kaba la kdew ba ka buh jingma ïa ki paidbah bad ki kali kiba ïaid ba ïeng.
Ïa kane ka rai la shim ha ka jingïalang ba la pynlong ha ka 15 tarik u Jymmang ba la pynïaid ïa ka jingïalang da ka Deputy Commissioner ka East Khasi Hills District ka Kong RM Kurbah bad ïa kane ka jingïalang la khot hadien ba u Manager (P), ka NHIDCL, PMU-Mylliem, u la pynpaw ïa ka jingsngewkhia halor ka jingdon kiba shong die jingdie ha bun tylli ki lynti ïaid (ROW) naduh Rilbong Point haduh 3 Mer Shiteng bad 7 Mer Upper Shillong.
U Manager u la pynpaw ruh ïa ka jingsngewkhia halor ka jingbuh ïa ka jaka pynïeng kali ha Rilbong Point. “Namar ba kane ka jingkyntur ki kali ha surokbah ka lah ban wanrah jingma kaba khraw ïa ki paidbah, ki nongdie jingdie kumjuh ruh ïa ka jingïaid jong ki kali, ha ka jingïalang la rai ba ki Ophisar ka tnad Pulit, ka PWD (Roads), NH Division Shillong bad ka NHIDCL ki dei ban ïatreilang ban pynkynriah ïa ki nongdie jingdie”
Ban pyntreikam ïa katei ka hukum, la bthah ïa ka NHIDCL ban buh dak ha kine ki bynta jongka surok, ka Ophis u Superintendent of Police (Traffic) kan buh ïa ki jingker ban pyrking ïa ka jingpynïeng kali hapoh ka bynta ROW bad ban buh ïa ki pulit ban peit ha ka jaka.
“Ka jingïalang ka la rai ruh ba ka NHIDCL, PWD (Roads) NH Division, bad ki Pulit kin ïatreilang ban weng ïa ki nongdie jingdie hadien ba la dep ai jingtip sha baroh” ong ka kyrwoh.
Ka surokbah Shillong-Dawki ka dei ka surok kaba kongsan bad ki heh Sorkar ki la ban jur ba ka jingkyntur pud ki kali ka pynthut ïa ki kali kiba ïaid ha surok bad kaba buh jingma ïa ki nongleit nongwan.
