Shillong, Jymmang 24
Ka Akashvani Shillong bad ka Akashvani North Eastern Services (NES), ha ka sngi Saitjaiñ ki la pynlong ïa ka prokram ka put ka tem ha State Convention Hall Shillong, kum ka dak jong ka jingdap 90 snem ka jingai jingshakri ka Akashvani kum ka nongai jingtip jong ka Ri.
Ha kane ka prokram la ïoh ïa ki sur jingrwai na ki nongput nongtem bad na ki kynhun nongtem ba pawnam jong ka Meghalaya kiba kynthup ïa ki jingrwai Khasi tynrai da ka Balahpynhun Mawlong bad ka kynhun, ki jingrwai Garo da Ahowee Folk Band bad ki jingrwai Jaintia da ka Seiñraij Art & Culture Group.
Ki la don ruh ki jingrwai pyrthei na ka Kong Shirley Passah bad ki jingrwai Hindi na ka Kong Ribhakupar Shadap, ba la jop ïa ka thup Modern Folk jong ka NE Body can Sing ha u snem 2016, kaba long ka prokram ban wad ïa ki briew ba don sap ha ka put ka tem ha ka thaiñ shatei Lam-mihngi ba la pynlong da ki Akashvani Station.
Haba ai jingkren kum u kongsan, u Principal Secretary ka Sorkar Meghalaya u Bah Frederick Roy Kharkongor, u la ong, “Kane ka long kum u Mawmer uba kongsan. Ka Akashvani ka don ha palat 90% jong ka India. Wat hapdeng ki lad kiba bun kiba ngi don ha ka broadcast, print bad electronic media bad ka online media, ka jingshaniah ka kham bun ha ki khubor na ka Akashvani namar ki ai ïa ka khubor kaba shai bad kaba lah ban shaniah”.
Haba kren shaphang ka Mann Ki Baat, u la ong, “U Myntri Rangbahduh ka ri, u Narendra Modi u ïakren bad ki nongshong shnong shaphang ki kam bapher-bapher. La bun ki bynta shaphang ka Meghalaya kiba la mih ha kine ki jingkren jong u Myntri Rangbahduh. Kumta haba ngi kren shaphang ka sur, ka jingpaw bad ka jingkongsan, nga tharai ba ka Akashvani ka don ha khlieh duh”.
U la ai jingïaroh ïa ka Akashvani bad ka Doordarshan kiba la pynbiang ïa ka rynsan na ka bynta ki briew ba don sap kiba dang sdang pawnam bad ka la ai ka lad ïa ki ban poi sha ki ïing ha kylleng ka Jylla bad sha kiwei-kiwei ki ri ruh.
“Katba phi rakhe ïa kane ka jingdap 90 snem, sngewbha bteng ban leh ïa kane ka kam kaba bha kum ka paralok bad ka sur jong ka ri, bad bteng ban wanrah ïa ka jingbha, ka jingpaw bad ka sur ïa ki riew don sap, ïa ka kam pathai khubor bad ruh ïa ka pyrthei baroh kawei” la ong u Bah Kharkongor.
