Shillong, Jymmang 24
Ka Hynñiewtrep Youths’ Council (HYC) ka pynpaw ïa ka jingsngewkhia kaba jur bad ka jingbymhun halor ka jingkiew dor, kaba bteng jong ka petrol, diesel bad ka domestic cooking gas (LPG), kaba la buh ïa ka jingkhia kaba khraw halor ki paidbah jong ka Meghalaya.
Kane ka jingkiew dor jong kine ki mar kiba donkam, ka la ktah jur ïa baroh ki bynta jong ka imlang sahlang, khamtam ïa ki nongbylla sngi, ki nongrep, ki kam khaii, ki nongniah kali kamai, ki samla pule bad ki longïing kiba duna ka jingïoh jingïarap pisa.
Ha ka kyrwoh ba la phah, ka HYV ka la kde, ba ka jingkiew dor jong ka umphniang, ka la wanrah ïa ka jingkiew jong ka bai kit bai bah bad hadien kata ka la pynkiew ruh ïa ka dor jong ki mar ba donkam bad ki jingshakri bapher-bapher, kaba la pynjynjar shuh-shuh ïa ka jingim man ka sngi jong ki paidbah. Kumjuh ruh, ka jingkiew dor jong ka gas shet jingbam ka la kylla long ka jingeh kaba khraw ïa ki longïing, kiba la mad lypa ïa ka jingkhia jong ka ïoh ka kot bad ka jingkiew dor jong ki mar.
Ka HYC ka ngeit skhem ba ka Sorkar kam lah ban shu peit, katba ki paidbah ki dang mad ïa kine ki jingeh. Ka umphniang bad ka gas shet jingbam ki dei ki jingdonkam ba kongsan jong ka jingim, ym ki mar pynkmen ne mar kyrpang, bad kadei ka kamram jong ka Sorkar ban pynthikna, ba ki nongshong shnong kin ym shah pynngat ha ka jingkhia kaba palat.
Namarkata, ka HYC ka kyntu ïa ka Sorkar Meghalaya ba kan tuklar mardor da kaba bishar biang ïa ki khajna bad ki jingïoh lum pisa jong halor ka umphniang, ban wad ïa ki lad jingïarap kyrpang bad jingïarap pisa na ka bynta ka Meghalaya bad ban shim ïa ki sienjam kiba skhem ban pynduna ïa ka jingkhia jong ki paidbah.
“Ka Sorkar kadei ruh ban ïatreilang bad ki bor ba dei khmih, khnang ban pynthikna ba ka bha ka miat bad ka jingïada ïa ka jingmyntoi jong ki paidbah kan neh,” la ong ka HYC.
Ka HYC ka maham ba ka jingbitar bad jingbymhun jong ki paidbah ka dang kiew, bad ka kyntu ïa ka Sorkar ba kan leh ei-ei khlem jingïai pynslem shuwa ba ka jinglong jingman kan nang sniew shuh-shuh.
Shuh shuh ka la ong ba ka Council ka ïengskhem bad ki paidbah bad ka pynskhem biang ba ka synshar paidbah kadei ban buh hakhmat eh ïa ka bha ka miat bad ka jingdonkam jong ki nongshong shnong.
