Shillong, Jymmang 24
Ka met iap jong ka Kresitha G Momin kaba la khlad noh ha Dubai ha ka 21 tarik Jymmang ka la poi ha New Delhi ha ka sngi U Blei bad yn pynkit ia ka da ka liengsuin sha Guwahati shwa ban rah sha iing jong ka ha Rongjeng na ka bynta ka jinglehniam ba khatduh.
Ha ka jingpynbna lyngba ka durkhih, u Myntri Rangbah ka Jylla u Conrad K. Sangma u la ong ba ka khubor jong ka jingkhlad noh jong ka Kresitha G Momin ka long kaba “sngewsih shibun.”
U la bynrap, “Haba ngi la ïoh ïa ka khubor ïa ka jingkhlad noh jong ka Kresitha G Momin kaba la khlad noh, ka dei ka khubor kaba sngewsih bha kaba nga la ïoh jingtip lyngba u MLA ka Rongjeng, kane ka jingtip ka la wan sha nga bad namar ba ym don uwei ruh na ki bahaïing uba don ïa kano kano ka passport, kam don lad shuh ban kyrshan ïa ka longïing ha katei ka por.”
U myntri rangbah u la ong ba u la pyntreikam mardor ia ki lad ba thikna na ka bynta ban pynphai biang ia ki briew. “Nga la khot mardor ïa u Chief Secretary jong ka jylla jong ngi bad ki heh ophisar bapher bapher bad pyntreikam ïa baroh ki lad jingiarap ban pynsuk ïa ka jingtreikam ban wanrah biang ïa ka metïap jong ka Kresitha G Momin kaba la khlad noh,” u la ong.
“Ka metïap ka la poi mynta ka sngi bad yn sa phah sha Guwahati bad nangta ban pynpoi sha kiba haiing sha Rongjeng,” bynrap biang u Sangma.
Haba pynpaw ïa ka jingsngewlem, u la ong, “Nga shim ïa kane ka khyllipmat ban pynpaw ïa ka jingsngewlem kaba khraw ïa kiba haïing hasem bad nga duwai ha uba donbor baroh ba un ai bor ïa ka longïing ban kit ïa kane ka jingduh kaba khraw kaba ki la mad.”
Ka Kresitha G Momin, ka la ngat ha ka jingpang klongsnam ha ka 15tarik Jymmang bad ka la shah sumar ha kawei ka Hospital shimet ha Dubai, ha kaba ka la khlad noh ha ka 21 tarik mynta u bnai.
Ha jaka buh metiap ha kad liengsuin Delhi, ki ophisar bad ki nongtrei jong ka Meghalaya House, Delhi, ki la leh burom bad ai syntiew na ka bynta u Myntri Rangbah ka Jylla.
Ki bahaïing hasem kin pdiang ïa ki metïap ha Guwahati bad synran ïa ki sha Rongjeng.
