Shillong, Jymmang 24
Ka Dorbar Shnong Mawrapad lyngba ka Biodiversity Management Committee, ka la pynlong ïa ka jingrakhe ïa ka ‘International Day for Biological Diversity’.
Ha katei ka sngi, ka Dorbar Shnong ka la pynlong ka jingpynkhuid shnong da baroh ki nongshong shnong kynthei bad shynrang, ki riew rangbah bad ki longkmie bad ka jingpynshngaiñ ki samla shnong ka VDP bad ka Sport Club, bad ki dkhot Self Help Group.
Kumjuh ha kane ka sngi, la pynlong ruh ka jingthung dieng hapoh shnong bad ruh ka jingpynïakop dro dur, katkum ka phang ‘Pynneh pynsah ïa ka mariang’ ha kaba la ïashim bynta da ki khynnah rit bad la sam khusnam ïa ki nongjop bad hadien kata la pynlong ïa ka Awareness Programme halor kumno ban leh ki kam ban pynneh pynsah ïa ka mei mariang bad ban kiar na ki jingpynjot ïa ki sawdong sawkun.
La wan ban pynshngaiñ ïa kane ka prokram da ka jingdon lang u Officer Incharge ka Mawsynram Police Station u E. Marak, ha kaba u la kyntu ban long kiba phikir ban pynjot ïa kiba don ha sawdong sawkun bad ban pynlong ka jingïatylli ha shnong ha thaw ban wanrah ka jingryntih ha ki kam baroh, khamtam kaba pynneh pynsah ïa ka mariang, ki khlaw ki btap ki mrad ki mreng.
Kumjuh la ïoh ka jingkren na u Bah Lumbor Surom u wei na ki dkhot ka BMC Mawsawa bad ka 5 Shnong BMC, la ïoh jingkren ruh na u President VDP Bah Kenesjones Nonglait bad ruh na u Secretary ka Sport Club Shnong, kiba la ai mynsiem ïa ka BMC ban nangïaid shaphrang, ha kaba pynneh pynsah ïa ka mei mariang, “Ka wanrah jingkyrkhu namar kiei-kiei kiba ha kiwei ki jaka kim don shuh, hynrei hangne ha ka dong jong ngi, ki dang don kum ki jingthung bad ki mrad kumjuh.”
La pynïaid ïa ka Awareness Programme da u Rangbah Shnong bad Chairman ka Mawrapad BMC, ha kaba u la pdiang bad ai khublei ïa baroh kiba la poi ha katei ka prokram.
U la pynbna lyngba ka jingïohi jngai jong ki longshuwa bad ka jingsumar ïa ka khlaw adong, mynta baroh shi shnong, ngi ïoh ban dih um bad pyndonkam pahuh ha ki ïing ki sem lyngba ka um, kaba mih na ka khlaw shnong.
Shuwa ban pynwai u Rangbah Shnong u la ïalam ba baroh kiba poi kin ïa pyrta lang, ban ong ‘Em’ ka jingpynjot mariang bad ban ong ‘Hooid’ ban ïada ïa ka mariang.
U Rangbah Shnong Bah Kyrmen Shangdiar, u la khublei bad kyrkhu kyrdoh ïa ki nongshong shnong kiba la kloi ban ïasnohkti lang ban pynlong ïa ka progkram kaba jop.
