Shillong, Jymmang 24
Ka Division Bench jong ka ïingbishar Meghalaya High Court ha ka 22 tatik u Jymmang 2026 ka la shim bishar ïa ka Public Interest Litigation (PIL) ba la ujor da u Bah Adelbert Nongrum haba ïadei bad ka bhah ba la buh kyrpang ïa ka ‘State Quota’ na ka bynta ki jingpule ba kham halor.
Kane ka Division Bench ba la shim bishar bniah ïa kane ka mat, ka kynthup ha ka jingïadonlang u Chief Justice Justice Revati Mohite Dere bad Justice W. Diengdoh.
Ha ka jingbishar, u Advocate General u la buh jingkylli ïa ka jinglah ban pynneh ïa ka PIL bad ban wad ïa ka por ban ai ïa ka Affidavit kum ka jubab. Ka ïingbishar ka la ai ïa ka jingkyrpad bad ka la bthah ba ïa ka Affidavit yn ai hashwa ka tarik ban don biang ka jingbishar da kaba buh lypa ïa ki kopi sha u nongïasaid aiñ jong u nongmudui pyrshah. Ïa kane ka mat la buh ka tarik ban don biang ka jingbishar ha ka 5 tarik u Jylliew 2026.
Katkum ka jingthoh lyngkot jong ka PIL, ka jingeh halor ka jingpynneh ïa ka bhah jong ka State Quota ba la ai sha ka Jylla Meghalaya hapoh ka ‘Central Pool Quota’ da ki Ministry bapher-bapher hapoh ka Sorkar India na ka bynta ki jingpule ba khamheh kum ka MBBS, Paramedical, Engineering, Architecture, Agriculture bad Veterinary ha ki jaka pule shabar ka Jylla. Ka dorkhas ka la kdew ba ka Sorkar Jylla Meghalaya ka la dep phah ïa ki jingtip bad ki la dep phah ‘advertise’ ban khot ïa ki khynnah ba biang ka kyrdan ban applai ha kine ki ‘seat’ ba la buh kyrpang.
Hynrei, haba pynlong ïa ka jingjied ïa ki khynnah ba applai, ki bor synshar ki kynnoh ba kiba applai ïa ka State’s Job Reservation Policy ban sam lang ïa ki ‘seat’ hapdeng ki Khasi-Jaintia, ki Garo bad kiwei de ki jaitbynriew bad ki General Category.
Ka PIL ka la kyntait ba baroh ar ka kyrdan (categories) bad ka jingbun jong ka bhah na ka bynta ka State Quota ha ka jingpule bad ki ‘seat’ ki dang shah pdiang na ka Policy ba la buh jong ka Job Reservation Policy khlem da don kano-kano ka Reservation Policy kaba la buh tang na ka bynta ka pule puthi.
Ka dorkhas ka la kynthoh ba ka Reservation ka long ka jingpynkylla ïa ka nongrim ka riti synshar-khadar ban don ïa jingïaryngkat bad kano-kano ka Reservation khlem ka nongrim katkum ka aiñ ka long ka kam be-aiñ.
Kiba mihkhmat na ka bynta u nongmudui ki dei ki Advocate P.Yobin bad A Dkhar bad ki nongjubab katba ïa ki nongshah mudui jong ka Jylla la mihkhmat da u Advocate General u Amit Kumar ryngkat u Advocate General ND Chullai, Additional Senior Government Advocate AH Kharwanlang, Government Advocate ER Chyne bad Government Advocate Ms I. Syiemlieh.
