Shillong, Jymmang 25
U Superintendent of Police (SP) ka East Khasi Hills, Bah Vivek Syiem ha ka Lah Sngi U Blei u la ong ba ki pulit ki dang ap ïa ka kaiphod jong ka ‘Post Mortem’ bad ‘Forensic’ halor ka jingjia shah kynnoh thombor ha Pynter hashuwa ban poi sha kano-kano ka rai pynkut halor ka daw jong ka jingïap.
“Hadien ba la dep ban khlong bad pyndep ïa kiei-kiei baroh, la leh ïa ka ‘Post Mortem’ ha katei ka jaka hynrei ngim pat ïoh ïa ka kaiphod ‘Post Mortem’. Ngin sa ïoh jingshai tang ynda ngi la ïoh ïa ka kaiphod ‘Post Mortem’ bad kiwei-kiwei ki kaiphod ‘Forensic’,” ong u SP haba ïakren bad ki nongthoh khubor.
Na ka liang une u heh pulit u la kyntait ban kren eiei la hato katei ka jingïap ka don jingïadei (eiei) ne em bad ka jingshah kynnoh thombor ha ki dkhot ka VDP.
“Ha kane ka khyllipmat ngam pat lah ban ong eiei, tang ynda ngi la ïoh ïa ka kaiphod ‘Post Mortem’, ngi lah ban ong la ka dei na ka jingshah kynnoh thombor ha ki dkhot ka VDP ne ka dei na kiwei pat ki daw,” u la ong.
Halor ka jingtreikam jong ka aiñ, u SP u la kdew ba ki sienjam kiba hadien kin shong ha ki jinglap.
“Kumba nga la ong hashuwa, ngin tynjuh ïa ka jingshim jamin lypa tang hadien ba ngi la ïoh pdiang ïa ka kaiphod ‘Post Mortem’,” la ong u Bah Vivek.
