Shillong, Jymmang 25
Ka Hynñiewtrep Integrated Territorial Organization hapoh ka jingïalam u Bah Donbok Dkhar, President, ka la leit buh da ka dorkhas sha u Chief Excecutive Member (CEM) ka Khasi Hills Autonomous District Council, u Bah Winston Tony Lyngdoh, na ka bynta ban pynsngew ïa ki katto katne tylli ki mat jingdawa.
Ha ka dorkhas, ka HITO ka la dawa na u CEM ka KHADC, ban thung jingtohkit halor ka jingkynnoh pyndonkam bakla ka Hima Mylliem ïa ka pisa ka tyngka.
Ka HITO ka la pynpaw ïa kane, hadien ba la paw pyrthei ïa ka jingshah sospon u Syiem ka Hima Mylliem, u Pa’iem Ainam Manik Syiem myn ha ka 22 tarik u Jymmang 2026.
Haba kren sha ki lad pathai khubor, u Bah Donbok Dkhar, Presi-dent u la ong ba ka jingsospon ïa u Syiem ka Hima kadei halor ka jingkynnoh ba la pyndonkam bakla u Syiem ka Hima Mylliem ïa ka pisa kaba kot kumba 3 klur tam ei-ei, kaba khlem siew sha ka District Council naduh ki snem ba la dep.
“Kumno tang 3 klur ka Hima Mylliem ka ïoh pisa, haba ka Hima ka peit palat 600 tylli ki shnong, ki ïew bad kiwei kiwei de,” u la ong.
U Bah Donbok u la ong hadien ba la ïoh jingtip halor ka jingshah sospon ïa u Pa’iem Ainam Manik syiem, na ka liang ka seng ka sngew ban wan mih sha ka District Council ban dawa ka jingtohkit ha kaba ïadei bad ka kynrum kynram kaba mih na ka Hima Mylliem.
“Ngim sngewïahap ban ïoh jingtip, ba ka Hima Mylliem, kan ïoh lum tang kumba 3 klur ha ka shi snem. Hynrei kaba ngi sngewthuh ka jingïohlum pisa ka Hima Mylliem ha ka shi snem kan dei beit palat ïa ka 20 klur,” la ong u Bah Donbok.
Kumta u la dawa ba ka District Council kadei ban pynlong ïa ka jingtohkit kaba bniah, khnang ban lap shuh shuh ïa kata ka jinglum khajna bad ban lap ruh ïa ka jingïadie ïathied jaka ha Raid Marwet.
Haba kylli, la kane ka kam kadei na ka jingbam sap halor ka jingjah ka pisa, u Bah Donbok u ong “Lada ym dei ka jingbamsap, balei kan mih ka jingshah sospon ïa u Syiem. Dei ba don ka jingbamsap, ka District Council ka sa sospon ïa u Syiem”.
