Maham ka Sorkar ïa ki arshaka kiba kamai beaiñ

Shillong, Jymmang 25

Ki arshaka kiba kamai ki dei ban pynrung kyrteng ne register bad ka District Transport Office bad ban shim ïa ka laisen shwa ban sdang ka kam, ha kaba ka Sorkar ka la maham ban leh da kaba tyngeh pyrshah ïa kito kiba treikam beaiñ.

U Commissioner & Secretary ba khmih ïa ka tnad Transport u Sanjay Goyal ha ka sngi Nyngkong u la ong ba ka jingkhynra bad talasi pyrshah ïa kito kiba treikam beaiñ la dep ban pynïaid shakhmat.

“Ngi la dep ban shim ki lad ki lynti ban talasi pyrshah ïa ki bad ha kaba ngi la dep ban khang ruh ïa ki jaka kaba ki treikam la kham slem bad nalor kata, lada ki dang don kiba treikam beaiñ, nga kyrpad ïa ki paidbah ban wan shakhmat bad pyntip sha ngi bad ai ba ka kompeni kan pyndep ïa baroh ki jingdonkam bad ban sa treikam bad lada ngi dang lap ba ki don kiba treikam beaiñ, ngi la dep ban ai ka jingbthah kaba shai sha ki DTO ba kin shim ki lad jingpynshitom katkum ki kyndon jong ka aiñ,” u la ong.

U la pyntip ba ka Kynhun Myntri ka Sorkar Jylla kala dep mynjur ïa ka Bike Aggregator Rules, nalor ka rule “shim wai ïa ki arshaka” lane “shim wai ïa ki taksi” na ka bynta ki nongjngohkai kiba kwah ban ñiah hi ïa ki kali.

“Ngi la wanrah ïa ki rule ne ki kyndon. Ki nongai wai ïa ki arshaka kila don, ka kynhun Myntri kala ai jingmynjur ïa ki,” ong u Goyal.

Haba kdew ïa ka jingduna ka jingtip, u la kyntu ïa ki nongñiah arshaka ba kin ïaid na ki lynti kiba dei.