Shillong, Jymmang 25
U Superintendent of Police ka East Khasi Hills, u Bah Vivek Syiem ha ka sngi Nyngkong jong ka taïew, u la ong ba ki pulit ki la sdang ïa ka jingtohkit halor ka jingshah pynjulor ka kali jong u Pastor Macdonald Pyngrope bad ki pulit ki dang khmih bniah ruh, la katei ka jingjia kadei ne-em kaba don bynta bad ka jingmih ka kynrum kynram hapoh ka Balang Presbyterian Mawkhar.
Kane ka jingjia ka la jia ha ka miet jong ka sngi U Blei.
“Hynnin ka sngi ha ka por 9:30 ngi lah ïoh ïa ka jingtip ba ka kali Bolero kaba lieh jong u Pastor Macdonald Pyngrope, kaba la pynïeng harud surok Wahingdoh, ka la shah pynjulor. Ka ïit jong ka kali ka la shah pynpait” la ong u Bah Vivek. U Pastor u la ujor da ka ejahar ha Lumdiengjri Police Station.
“Halor katei, u la ujor da ka ejahar ha Lumdiengjri, ïa kane la shim kum ka Zero FIR bad la pynkynriah noh ïa ka sha Sadar Police Station,” la ong u Bah Vivek.
Ki pulit jong ka Sadar Police Station, ki la sdang ïa ka jingtohkit halor kane ka jingjia.
Ki pulit kila shimkhia ban ithuh noh ïa kiba donkti halor katei bad ban lap ruh halor ka jingthmu ka jong ki.
“Ki Pulit ki dang trei ïa ka kam ban lap ïa kine ki nongleh kam sniew bad ruh ban wad ïa ka jingshisha la kine ki riewsniew, ki don ïa ka jingthmu ban tuh, ne ki don da kawei pat ka jingthmu” la ong u Bah Vivek Syiem. Haba kylli la ka don kano-kano ka jingïadei, ha kaba ïadei bad ka kynrum kynram kaba la mih hapoh ka balang Presbyterian Mawkhar, u Bah Vivek u la ong, “Hooid, ka la don lypa ka kynrum kynram hapoh ka balang, hynrei ngin sa lah ban pynthikna tang hadien ba ngi la tohkit ïa kane ka jingjia, la kadei kaba don bynta eiei bad ka jingïashrut hapoh ka balang ne kadei thik tang ka kam ban tuh ban thiem ïa ki jingdon jingem”.
U la pynthikna ruh ba u Pastor Macdonald Pyngrope kham hashuwa, u la dep ban ujor ïa ka ejahar.
“Hooid, u dei u juh hi u briew uba la ujor ïa ka ejahar halor ka jingkynnoh bamsap hapoh jong ka balang” la ong u Bah Vivek Syiem.
Ha kaba ïadei bad katei ka jingjia jong ka kam bamsap hapoh ka balang Presbyterian Mawkhar, u SP u la ong, “Ïa ka jingjia kaba nyngkong lah dep ban chargesheet, ha kaba la shem ba ka la jah ka pisa haduh T.3 klur. U Pastor ula ujor sa ïa kawei ka ejahar ha kaba ka la don ka jingpyndonkam bakla ïa ka T.4 klur.
Ngi la shimkhia ïa kane ka kam bad ka Ïingkashari bad na ka liang jong ka Ïingkashari ka la ai ka jingbthah ïa ngi ba kan ïai bteng beit ïa katei kajuh ka Case bad lada jia ba ka don kano-kano ka jingjia kaba thymmai ne ki jinglap kiba mih, kumta kan ïai bteng beit da kajuh hi ka jingtohkit”.
