Shillong, Jymmang 25
Ki kam tuh kam thiem ki dang ïai bteng na kawei ka sngi sha kawei pat bad ïa kane lah ban sakhi na ki jingjia kiba dang jia ha kine ki sngi ha kylleng ki bynta jong ka nongbah Shillong bad wat ruh ha kiwei pat ki bynta jong ka Jylla.
Katkum ka khubor na ki pulit la ong ba u Bah Lurshai Marboh u la ai ka jingujor ba ha ka janmiet jong ka 22 tarik mynta u bnai, ki runar bym lah ban ithuh, ki la tuh ïa ka arshaka ka jong u, kaba don ïa u registration number ML05-AB-0941 na khyrdop jong ka SRGT ha Golf Links, Shillong.
U Weringson Shabong ruh u la ai ka jingujor ba ha ka 22 tarik mynta u bnai, ha ka por kumba 8 baje mynmiet, ki runar bym lah ban ithuh, ki la tuh ïa ka arshaka ka jong u, kaba don ïa u registration number ML05-AD-4915 najan ka SSA Stadium, Polo, Shillong.
Kumjuh ruh na ka liang jong u Demon Lamin u la ai ka jingujor ba ha ka miet hapdeng ka 21 bad 22 tarik mynta u bnai, ki runar bym lah ban ithuh, ki la tuh ïa ka arshaka ka jong u, kaba don ïa u registration number ML05-AE-0458 ryngkat bad ki kot ki sla kiba bun kiba dei jong u kpa jong u, na Lower Arbuthnot Road, Shillong.
Katba na ka liang jong ka Kong Cherry Lyngdoh Nongrang ka la ai ka jingujor ba ha ka janmiet jong ka 20 tarik mynta u bnai, ki runar bym lah ban ithuh, ki la tuh ïa ka kali ka jong ka, kaba don ïa u registration number ML05-S-4928 na MG Road, Shillong.
Ha kawei pat ka khubor, u Kamdathrang Syngkon u la ai ka jingujor ba ha ka 19 tarik mynta u bnai, ki runar bym lah ban ithuh, ki la tuh ïa ka Laptop ka jong u, kaba shongdor kumba T.45,000/- na Shillong Public Futsal Ground, Laitumkhrah, Shillong.
Na ka liang jong u Bah Rapborlang Lyngdoh u la ai ka jingujor ba ki runar bym lah ban ithuh ki la tuh ïa ka arshaka ka jong u, kaba don ïa u registration number ML05-X-5306 na ka thaiñ Lumshyiap, Shillong.
Na ka liang jong u In-Charge ka Wards Lake, Shillong u la ai ka jingujor ha ka 22 tarik mynta u bnai, ba ki runar bym lah ban ithuh, ki la prong tuh ha jaka sait khmat sait khmut ki heh ki hain (VIP washroom) kaba don ha Wards Lake bad ban rah tuh ïa ki san tylli ki ‘water faucets’ kiba shongdor kumba T.40,000/-.
