Ai jingïaroh ka BJP ïa ka Sorkar Pdeng halor ka khusnam ‘Padma Shri’ ïa u Bah Hally War

Shillong, Jymmang 26

Ka State Bharatiya Janata Party (BJP) ka la ai khublei ïa ka Sorkar Pdeng hapoh ka jingïalam u Narendra Modi kaba la pynkup burom da ka khusnam ‘Padma Shri’ ïa u Bah Hally War na ka bynta ka jingtrei jong u ha ka ban tei bad pynheh-pynsan ïa ki jingkieng-jri.

“Ka Sorkar Pdeng ba la ïalam da u Myntri Rangbahduh ka ri, u Narendra Modi, sa shisien ka la ithuh ïa ka jingnoh synñiang jong ka Meghalaya sha ka ri da kaba ai ïa ka khusnam ‘Padma Shri’ ïa u Bah Hally War namar ka jingaiti lut jong u ban tei bad pynroi ïa ki jingkieng-jri, ka pateng mynbarim, kumjuh ka dak jong ka Jylla jong ngi,” ong u nongaiktien ba rangbah ka BJP, Bah Mariahom Kharkrang ha ka kyrwoh ha ka Sngi Ba-ar.

U Bah Kharkrang u la ong ba kane ka khusnam ka la “wanrah lane buh hakhmat ïa ka jingstad tynrai jong ka Meghalaya bad ka buit shna jingshna ba khlem pynmih ïa kano-kano ka jingjaboh.”

“Katba ngi pynpaw ïa ka jingsngewnguh kaba khraw sha ka kynhun jong ka Sorkar Pdeng, ngi tikna ba hadien ka nam bad jingithuh jong u Bah War, ka rukom treikam ba kyrpang jong ka Jylla haba ïadei bad ka mariang kan kylla long ka nuksa na ka bynta ka ri baroh kawei, ka ban thaw pat ïa ka lawei kaba ïaineh na ka bynta ka India,” la bynrap shuh-shuh ka kyrwoh.

Ka seng ka la kdew ba ka ‘Padma Shri’ jong u Bah War “ka bud khlem da pynslem ïa ka ‘Padma Shri’ jong ka Kong Silbi Passah, kaba la ai sha ka ha u snem 2024.”

Ka kyrwoh ka la kdew ruh ïa ka jingkren ba dang shen jong u Myntri Rangbahduh ha ka ‘Mann Ki Baat’, ha kaba u la kdew ïa ka ‘Eri Silk’ jong ka Meghalaya.

“Ka buit stad ban shna jingkieng-jri jong ka Meghalaya, ka kolshor tynrai kaba riewspah bad ka ryndia ki dei ki jingpynpaw jong ka jingstad tynrai, jingkitkhia bad ka jingtbit hyndai. Hynrei, ïa ka pateng ba riewspah jong ka Jylla la shu iehnoh kumto da ki Sorkar Pdeng ba mynshuwa,” ong u Bah Kharkrang.

“U Myntri Rangbahduh ba donburom, u Narendra Modi bad ka kynhun ka Sorkar Pdeng ha kawei pat ka liang ki ïai bteng ban ithuh ïa ka pateng ba riewspah jong ka Jylla. Kane ka daw ba balei ngi kner biang ïa ka jingsngewnguh sa shisien pat,” u la bynrap.

Ka ‘Padma Shri’ ka dei ka khusnam ‘riew paidbah kaba heh tam ha India kaba wan ha ka kyrdan kaba saw.