Shillong, Jymmang 26
Ka National Health Mission Employees Association of Meghalaya (NHMEAM) ka pyntip sha ki paidbah bad sha ki bor ba dei peit, ba ki nongtrei hapoh ka National Health Mission (NHM), Meghalaya, kim pat ïoh ïa ka tulop kaba dei jong u bnai Ïaïong (April) 2026, haduh mynta.
Kane ka jingbym ïoh tulop ha ka por kaba biang kam dei shuh tang kane ka sien kaba mynta, hynrei ka long kaba la jia bunsien.
Na ka liang ka Association, ka la pynsngew la bunsien halor kane ka bynta. Ha kaba ïadei bad kane, ki nongmihkhmat ka National Health Mission Employees Association of Meghalaya, ki la leit ban ïakynduh ïa u Myntri ba dei khmih ïa ka tnad ka koit ka khiah ka Sorkar Jylla, ha ryngkat ka jingïadonlang u Mission Director, NHM.
Ki la pyntip ba ha katei ka jingïakynduh, la pynsngew ïa ka jingeh kaba ki nongtrei ki ïakynduh, kynthup ïa ka jingbym ïoh tulop thikna lem bad kiwei-kiwei de ki mat, bad la aiti ruh da ka jingthoh.
Ha kane ka jingïakynduh, la ïoh ïa ka jingkular, ba yn sa pynbeit noh ïa kane ka kam hapoh ki katto-katne sngi. Hynrei, wat hadien katei ka jingkular, ym shym la pyllait satia ïa ka tulop kaba ki nongtrei, kidei ban ïoh.
Kane ka jingleh bym suidñiew ïa ki nongtrei, wat hadien ba la ïoh ban ïakynduh markhmat ïa ki nongpeit nongkhmih jong ka tnad, ka la wanrah ïa ki jingdkoh ha ka leit ka wan bad ka jingpynbiang ïa ki jingdonkam kiba man la ka sngi kiba ki nongtrei ki ïakynduh.
Ka Association ka la pyntip ba kane ka jingslem, kadei namar ka jingpyntreikam ïa ka rukom siew tulop kaba thymmai, ha kaba la donkam ban pynïasoh ïa u Aadhaar bad ka SPARSH, kumba la bthah da ka tnad ka koit ka khiah jong ka Sorkar Pdeng.
“Watla ka Association ka sngewthuh ïa ka jingdonkam ban wanrah ïa ki jingpynkylla ha ka rukom treikam, na ka liang jong ka Sorkar Jylla, ka la dei ban pyntip lypa sha ki nongtrei shaphang kine ki rukom treikam kiba thymmai kiba lah ban shim por bad ban ktah ïa ka por ban ïoh tulop. Hynrei, ym shym la ai kano-kano ka jingthoh kaba shai kaba pura. Khlem kano-kano ka jingpynbna kaba thikna, la pyntreikam noh ïa kane ka rukom kaba thymmai, kaba la wanrah ïa ka jingsah teng wat ha ka jingsiew tulop jong ki bnai kiba la dep,” la ong ka Association.
Shuh shuh ki la ïathuh ruh ba haduh mynta kim tip lano kane ka ‘system’ kaba thymmai kan treikam pura. La shu bthah da ki ktien ba ngi hap ban ap na kawei ka taïew sha kawei pat, kum ka dak tang ban pynhun ïa ki nongtrei, khlem da seisoh kita ki jingkular.
“Ka long kaba kongsan ban kdew ba bun ki nongtrei NHM, khamtam kito kiba trei ha ki CHC, PHC, Sub-Centre, bad ha kiwei ki bynta, ki mad ïa ki jingeh kiba jur ha ka liang ka pisa. Kine ki nongtrei ki hap ban shong kali na ki jaka kiba jngai ban leit ai jingshakri sha ki shnong kiba don ha Ri-lum Khasi, Jaiñtia, bad Garo ruh kumjuh,” la bynrap ka Association.
Nalorkata, ki la ong ruh ba ka jingslem ban ïoh tulop ka la ktah shikatdei eh ïa ka jingim jong ki, kaba man ka sngi bad kane ka lah ruh ban pynduh mynsiem bad pyndkoh ïa ka rukom treikam kaba man ka sngi.
Ka jingkiew dor jong ka umphniang bad kiwei-kiwei ki marbam-mardih ha ïew ha hat, ki la buh jingeh shibun eh ïa ngi ki nongtrei hapoh kane ka lama treikam, ha kaba ngim lah shuh ban pynbit pynbiang ïa ki jingdonkam kiba man la ka sngi. Ki nongtrei NHM ki dei u wei na ki rishot ba kongsan tam ha ka jingshakri ïa ka koit ka khiah ha ka Jylla Meghalaya, bad ki don palat 3,000 ngut ki nongtrei hapoh kane ka lama treikam, ki la ong.
Kumta ki ong “Ka Sorkar ka la dei ban pyrkhat sani bha ban ïarap ïa ki nongtrei jong ka, khnang ba ka jingshakri, khamtam ha ka liang ka koit ka khiah, kan ym shah ktah. Ka Association ka kyrpad jur ïa ka Sorkar Jylla ba kan peit pyrman bha ïa kine ki jingdkoh khnang ba yn lah ban siew kloi noh ïa ka tulop hapoh kine ki khyndiat sngi. Lada ka Sorkar kam lah ban pynbeit ïa kine ki jingeh hapoh kine ki khyndiat sngi, ka Association kam banse ban shim ïa ki sienjam kum ka jingsangeh treikam bad kiwei-kiwei ki jingïakhih paidbah, kiba lah ban long ha ka Jylla hi baroh kawei”.
