Donkam ban ïa pynbeit ka shnong Lapangap bad Tahpat ban wanrah jingsuk: Pynshngain

Shillong, Jymmang 26

U Bah Pynshngain Rattane uba dei u President ka United Karbi People’s Organisation (UKPO) kaba dei ka seng ki Khasi kiba sah ha Karbi Anglong u la ong donkam ïa ki ar tylli ki shnong kata ka Tahpat na Karbi Anglong bad ka Lapangap na West Jaiñtia Hills district ban ïakren pynbeit ban wanrah biang ïa ka shongsuk shongsaiñ.

Haba ïakren lyngba ka phone, u Bah Pynshngain u la ong lada ki ar tylli ki Jylla ki la pynbeit hynrei lada kine ki ar tylli ki shnong kim pat ïabeit kan buh jingeh biang.

U la ong ba kine ki jingïakajia ka dei namar ar tylli, u lum bad ki pynthor kba ka dei kaba ju rep ki shnong na Lapangap hynrei ka shnong Tahpat ka la kam trai mynta.

U la ong ba shwa ka 1951 baroh ka block-1 bad 2 ki hap ha Rilum Jaiñtia hynrei naduh ba la phiah ka Sorkar India la pynhap ha Assam.

Shuh shuh u la ong ba ki Karbi ki la kam ba kitei ki jaka rep jong ka Lapangap ki hap ha Assam katkum u pud u sam.

Kumban shu pynkynmaw ka shnong Lapangap ka ju leit rep ha kine ki lum bad pynthor kba hynrei mynta u snem kim pat ïoh leit rep namar la khang ki Karbi.

Ka jingbym nud ban leit rep ïa u kba ka dei namar ki Karbi ki siat beit da ki jri ïa ki nongrep kat haduh ba ki hap kynrandien noh.

Na ka liang ka shnong Lapangap kan sa shim rai mynta ka taïew la kan leit tur biang sha Secretariat ne kan shim da kiwei ki lad ban ïoh rep biang.