Vijayawada, Jymmang:
U Myntri Rangbah ka jylla Andhra Pradesh u N Chandrababu Naidu u la bthah ïa ki ophisar ban pynkhreh ïa ka jingthmu ba bniah na ka bynta ka jingpynroi ïa ka rud duriaw jong ka Andhra Pradesh kaba jrong 1,000 km, da kaba pynleit jingmut ha kaba pyndonkam ïa ka spah duriaw, ban ïada ïa ki jingthaw ba im, bad ban ïada ïa ki nongshong shnong harud nong.
Ha ka jingïalang bishar bniah bad ki riew shemphang bad ki heh ophisar ha ka ophis jong ka camp jong u, u Naidu u la ong ba ka jingthmu ka dei ban pynkylla ïa ka thaiñ rud duriaw sha ka jaka pdeng jong ka kam khaïi, ka kam jngohkai pyrthei, bad ki lad kamai katba dang pynthikna ïa ka jingpynneh pynsah ïa ka mariang.
U Naidu u la pynpaw ba ka Andhra Pradesh, kaba la mihkhmat lypa ïa ka ri ha ka jingshalan ïa ki dohum, mynta ka dei ban buh hakhmat eh ïa ka jingpynkiew dor ha ki dohkha khnang ban pynïoh ïa ka jingmih kaba heh tam.
U la maham ba ki jaboh kiba ha ki um ki dang mih kum ki jingpynjakhlia kiba khraw bad u la bthah ïa ki heh sorkar ban pynlong ïa ka jingwad bniah kaba pura ban weng ïa ki jingeh ha ka mariang.
U la ban jur ruh ïa ka jingdonkam ban pynneh pynsah ïa ki jingthaw ba im ha duriaw bad ban wad ïa ka jinglah jong ki marpoh khyndew kiba duna bha kiba la shem harud duriaw.
U Myntri Rangbah u la pynpaw ïa ka jingdonkam ban don ki lad jingïada ïa ki rud duriaw ban ïada na ka jingtwa khyndew bad ban ïaleh pyrshah ïa ki jingjia ba sngewsih kum ka ‘erïong.
U la tyrwa ban thaw ïa ka jingker mariang kaba lai tylli ki bynta ryngkat bad ki dieng jyrngam, ki dieng tlai bad kiwei pat ki jingthung jingtep ban lah ban ïada na ka jingktah jong ka ‘erïong.
U la bthah shuh shuh ïa ki heh sorkar ban bishar bniah ïa ki lad ha ka jingrep bad jingdie ïa ki mar rep, kiba lah ban plie lad kaba thymmai na ka bynta ki jaka rudnong.
U Naidu u la ong ba ka jingïohi jngai ka dei ban pynïasoh ïa ki polisi kiba ïadei bad ka mariang bad ka jingpynroi ïa ka kam jngohkai pyrthei, da kaba buh ïa ka rudnong jong ka Andhra Pradesh kum ka jingdon jingem ha ka ïoh ka kot bad ka kolshor.
U la pynpaw biang ba ka rukom treikam jong ka sorkar ka dei ban pynïasoh lang ïa ka jingpyndonkam ïa ki marpoh khyndew kaba neh, ka jingpynmih ïa ki lad kamai, bad ka jinglah ban ïakhun pyrshah ïa ki jingjia ba sngewsih ban pynthikna ïa ka jingroi jingpar kaba jrong na ka bynta ki nongshong shnong harud duriaw.
Ha kane ka jingïalang la ïadon lang u Agriculture Special Chief Secretary u B Rajasekhar, u Fisheries Commissioner u Naik, u Rythu Sadhikara Samstha Vice-Chairman u Vijay Kumar, bad ki nongmihkhmat na ki kynhun ba bun kiba dei khmih ha ki bynta jong ka duriaw.
