Shillong, Jymmang 26
U President ka Congress ha Meghalaya u Bah Vincent H Pala u la ong ba ki paidbah kin nym don lad shuh da kiwei ha ki sngi ban wan hynrei tang ka Congress, da kaba kam ba ka NPP bad ka BJP ki la phiah (divided) ïa ki briew ha ka lynti jong ka niam bad ba ka jingïaleh bad kynad hapoh ka NPP kan sa nangjur ha kaba kut jong u bnai Jylliew.
“Nga tharai ba ki briew kim don lad shuh da kumwei ha ki por ban wan. Ka NPP ha kaba kut jong u bnai Jylliew, phin sa ïohi ba kan sa mih bun ki jingïapait ïapra hapoh ka party. Ki la nangmih bun ki jingeh ha kiwei ki party ruh kumjuh,” la ong u Bah Pala.
U la kdew ïa ka jingbym sngewhun ba mih hadien ka jingbujli Myntri dang shen.
“Hadien ka jingbujli Myntri ha ka sien ba la dep, nga la ïohi ïa ka jingdon ka jingkhih hapdeng ki NPP. Kiba bun ki la wan sha nga. Ka jingeh hangtei ka nang jur”, u la ong.
Halor ka tiket Rajya Sabha ka ban wan, u Bah Pala u la kam ba ka la don ka jingkynad kaba la mih. “Kiba bun ki MLA na Rilum Khasi ki ong ba ngi kwah na Rilum Khasi bad bun ki MLA Garo ki kwah na Rilum Garo. Nga tharai kane kan wanrah shuh shuh ïa ka jingïapait ïapra hapdeng ki Khasi bad ki Garo hapoh ka NPP”, u la ong.
“Ka jingïakynad ka nang jur hapdeng ka BJP bad kumjuh ruh ka NPP. Ha ka jingtreikam bad ka jingshisha, kan dang don shuh shuh kata ka jingsngew ba ka liang Khasi ka shah iehnoh bad ka liang Garo ki la shim lut – naduh u Nongïalam ka Liang Pyrshah, haduh u Lamphang, haduh u Myntri Rangbah bad kumta ter ter. Kane ka dei ka jingïakren ha madan,” u la bynrap.
“Kyrmen, ba ki paidbah ka Jylla Meghalaya kin nym thep vote ha ka ‘line of communalism’ ne ka jingsngew niam, kaba kum ka BJP ka ju leh. Hynrei ki thmu ban leh ïa kane khnang ba kan long halor ka niam”, la ong u Bah Pala.
“Ka BJP bad ka NPP ki la sdang ban phiah ïa ki paidbah bad kam don ka jingïaryngkat hapdeng ki paidbah, ka nongrim jong ka BJP bad ka NPP ka long kajuh.”
U la maham ba kiwei pat ki seng kiba dang mih ki don kum kine ki buit. “Nga sheptieng ïa kiwei pat ki party ki ban wan ruh, ki nongrim jong ki kin long kumjuh. Ki kwah ban ïoh vote da kaba phiah ïa ki paidbah, kaba nga sngew ba ka long kaba sniew haduh katta katta ïa ka lawei jong ka Jylla jong ngi bad ka ri hi baroh kawei”, u la ong.
Haba pynïapher ïa ka Congress bad kiba ïaleh pyrshah, u Bah Pala u la ong, “Ha ka Congress, ngi la sdang naduh tynrai. Kiwei ki party ki hiar bad ngi kiew mynta. Hooid, ka Congress kan sa wan phai biang ha u snem 2028.” “Hooid, ki paidbah kin sa phai khmat sha ka Congress lyngba ka jingshemphang. Kumba phi ïohi, dei ka Congress kaba ïada ïa ki rit paid, dei ka Congress kaba ïada ïa ki riewlum”, u la ong.
U Bah Pala u la pynpaw ïa ka jingsngewkhia halor ka aiñ pdeng. “Mynta ka sngi, ka Sorkar India ka la dep wanrah ïa ka bill halor ka FCRA. Lada phi pule ïa kata ka bill, ki thmu ban shim noh ïa kiba bun ki ïingmane, kiba bun ki skul, kiba bun ki mar ki mata jong ki Khristan,” u la kam.
“Ha Assam, ki thmu ban wanrah ïa ka bill ban tehlakam ïa ki rit paid bad kumjuh ruh ïa ki Khristan – ka bill pyrshah ïa ka jingkylla niam. La leh ha ki 12 tylli ki Jylla, sa 2 tylli ki Jylla kin sa leh ïa kata”, u la ong. “Katkum ki kyndon aiñ, lada shiteng na ki Jylla jong ka ri ki pyntreikam ïa ka aiñ, kiwei pat ki Jylla jong ka ri India ki hap ban bud. Shen, ka West Bengal bad ka Assam kin sa ïoh ïa ka bill pyrshah ïa ka jingkylla niam.”
U la kynthoh ïa ka rukom treikam jong u Myntri Rangbah ka Jylla halor ka FCRA. “Lada phi ïohi ha ka FCRA, u Myntri Rangbah ka Jylla, ha ka jaka ban ïakynduh ïa u Myntri Rangbahduh bad Myntri Kam Pohïing ban pynsangeh ïa ka, u la leit ban ïakynduh ïa u Kiren Rijiju bad kiwei. Kam don jingmut satia. Kumta ka kam jong ki ka long tang ha ka ktien bad ki tieng ban kren pyrshah ïa ka BJP”, la ong u Bah Pala.
“Dei tang ka Congress, ka party kaba lah ban ïaleh pyrshah ïa ka BJP, la ka long ha ka ri ne ha ki Jylla”, u la bynrap.
“Namarkata, nga sngew ba ki paidbah kin sa wan phai biang shispah na ka shispah sha ka Congress ym namar ba ka Congress kam shym la leh ne kam shym la leh bha, hynrei lyngba ka jingshemphang kaba ki don.”
“Ka Congress ka dei ka party kaba shimkhia ïa uwei pa uwei u nongshong shnong, kaba shimkhia ïa kiba riewspah bad kiba duk bad baroh ki kyrdan jong ki briew ha ka ri India katba kiwei pat ki party ki dei tang na ka bynta ki katto katne ki paidbah. Katei ka dei ka jingïapher”, la ong u Bah Pala.
