Shillong, Jymmang 26
Ki nongñiah Rapido online ha ka sngi Ba-ar jong ka taïew, ki la leit ban ïakynduh ïa u Motor Vehicle Inspector (MVI), u Bah F Shadap, ban ïakren bad ïa pynbeit halor ka jingshah ñiew ba ki kamai beaiñ.
Haba kren sha ki lad pathai khubor, ki nongñiah Rapido online ki la ïathuh, ba ha ka jingïakren bad u MVI, ki la kyrpad ban ai jingbit noh ïa ki, ba kin kamai hynrei ka ophis DTO ka la bthah ba ki hap ban ïakynduh shuwa ïa ki 3 tylli ki ‘aggregator’, kiba don hapoh ka Jylla bad ba kin phah ïa ki kot ki sla sha ki, khnang ba kine ki ‘aggregator’ kin phah pat sha ka DTO bad na ka liang ka DTO kan sa ai ka jingbit ban kamai.
U wei na ki nongñiah Rapido u la ong, ba na ka liang jong ki kim tip ba ka jingkamai jong ki, ka long beaiñ bad mynta ki la ïoh jingshai bad ki hap bud hi ïa ka aiñ ka Sorkar.
“Mynta kiba kamai Rapido kin hap sangeh shuwa ban kamai, hynrei lada dang don kiba dang bteng ban kamai ruh ka shong ha ki hi, hynrei na ka liang ka DTO kan ïai khynra beit ïa kiba kamai beaiñ bad ka jingshah daiñ kuna ruh ka long kaba heh bha,” u la ong.
U la kubur ruh ba ka jingñiah Rapido, kadei kaba long beaiñ, bad kin hap ban bud ïa ka jingbthah ka Sorkar, khnang ba kin ïoh biang ka lad ban kamai da kaba suk. Ka ophis ka DTO, ka la bthah ba baroh kiba ñiah Rapido ne arshaka, kiba kamai, kidei ban buh da ka number plate kaba stem.
Ki nongñiah Rapido ki la ong, ba na ka liang jong ki, kin ïa pyrshang shuwa ban ïakren bad ki nongñiah Rapido offline bad lada ma ki ruh ki ïatreilang, ban leh number plate stem, ki kloi ban ïatreilang.
Shuh shuh ki la ïathuh, ba kim don jingtip ba ka khajna ba ki siew ha ka jingkamai online jong ki, ka leit shaei namar ba ka Jylla ruh kam ïoh ei-ei, namar ba ka ïaid beit sha ka Rapido.
