Shillong, Jymmang 26
U khlieh nongïalam ka Congress, Bah Vincent H. Pala ha ka Sngi Ba-ar u la ong ba yn ym lah ban pynbeit ïa ka jing-ïa-ka-jia pud hapdeng ka Assam bad Meghalaya lymda kynthup lang ïa ki nongshim bynta ha ka kyrdan jong ki shnong ki thaw, bad kynnoh ba ka Sorkar Jylla ka kular tang ka ktien halor kane ka kam.
“Ha kaba ïadei bad ka jingeh ha khappud, nga ju ong barabor ba kane ka Sorkar kaba mynta ka shu kular tang ka ktien sha ki paidbah,” la ong u Bah Pala.
“Lada ki kwah shisha ban pynbeit ïa ka jingeh jong u pud u sam, ki dei ban kynthup lang ïa ki paidbah bad kito ki shnong kiba don lang. Dei ban khot lang ïa baroh ki liang. Ki dei ban kynthup lang ïa ki District Council – KHADC ne JHADC – kumjuh ïa ki khlieh nongsynshar bad ki shnong kiba don ha kito ki thaiñ. Kata ka dei ka rukom ban pynbeit ïa ka jingeh,” u la ong.
Haba kynthoh ïa ki jingïakren ba dang shen, u la ong, “Mynta ki leit sha ki ‘Hotel 5-Star’, ki ïakren ba-heh bad ki ïasoi ïa ka jingïateh kular. Mano ban bud ïa ki? Kata ka dei ka jingshisha,” u la ong.
“Ki khappud kin ïai long kiba pynkhuslai katba kim pat lah ban pynbeit ïa u pud u sam ha ryngkat ka jingmynjur jong ki nongshim bynta,” u la bynrap.
U Bah Pala u la pynpaw ruh ïa ka jingbym biang jong ka roi ka par ha ka thaiñ khappud.
“Hooid, ym tang katta, kam don ka roi ka par hangtei ha kajuh ka por. Tang haba don ka jingeh, kin leit jngoh ïa kata ka jaka,” u la ong.
U la kynthoh ruh ba baroh ar tylli ki Sorkar Jylla ki don ïa ka jingïadei saiñ pyrthei ban pynbeit ïa katei ka kam.
“Nga tharai ba ka Sorkar ha Assam ka dei ka Sorkar BJP bad ha Meghalaya ruh, ka dei ka Sorkar BJP-NPP. Kam don jingïapher eiei,” la ong u Bah Pala.
“Lada ki kwah ban pynbeit, ki lah ban pynbeit. Nga ngeit skhem bha ba ki lah ban pynbeit lada ki kwah, hynrei nga tharai ba kim don mon ban pynbeit,” u la ong.
“Na ka bynta kiwei pat ki jaka kiba ki don mon, ki la pynbeit. Hynrei ha kito ki thaiñ kiba long na ka bynta ka jingmyntoi jong ki paidbah, kim shym la leh kumta,” u la ong.
