Shillong, Jymmang 26
Ka Meghalaya International Exporters Chamber of Commerce (MIECC), hapoh ka jingïalam ka Kong Dolly Khonglah, Secretary bad u Bah Soomeyoo SNS Sayoo, nongaiktien, ha ka 26 tarik u Jymmang 2026, ki la leit ban ïakynduh ïa u Symbud Myntri Rangbah ka Jylla, uba dei peit ïa ka tnad Transport, u Bah Sniawbhalang Dhar ban pynsngew halor ki jingeh ba ki shem.
Kane ka jingleit kynduh jong ki, ka long halor ki jingeh jingjynjar jong ki nongkhaïi, kiba don ïa ki kali rim bad kiba donkam ban pynbha ïa ki kot kali, ym tang na ka bynta ki kali heh, kumjuh ruh wat ïa ki kali rit, ki kali kamai bad ki trok kit mar kumjuh.
Haba kren sha ki lad pathai khubor, ka Kong Dolly Khonglah ka la ïathuh, ba hadien ka jingaiti ïa ka memorandum, u Symbud Myntri Rangbah u la kular ban rah ha ka cabinet, ka ban long ha u bnai ban wan, khnang ban ïoh ïa ka jingmynjur, ban wanrah noh da ka ‘One Time Settlement’.
Ka la ïathuh ba ha ka memorandum, la thoh shai ban ithuh kyrpang ïa ki kali rim, la ki dei baheh bad barit kaba dei kawei ka lad ba ai kam ai jam ha ki jaka kyndong bad sha ki shnong ki thaw jan khappud bad ki don ki kali ba la rim bym don kot shuh, kiba ju leit buh mar, la kyrpad ïa ka Sorkar ban wanrah noh da ka One Time Settlement na ka bynta kine ki kali.
Na ka liang u Bah Soomeyoo SNS Sayoo u la ïathuh, ba kane ka ‘One Time Settlement’ kan treikam lang ha baroh kawei ka Jylla, bad lyngba kane, yn ïarap ïa ki jingsiew ïa ki kot kali, ban lah ban kamai kajih bad kan long ka jingïohnong ruh ïa ki nongkhaïi bad ïa ki trai Jylla.
U la ong ba kum ka kynhun kim ïakynduh kum ka JAC hynrei na kylleng ka Jylla, la wan lang ban tylli lang kynthup ruh kiba na Garo Hills bad Jaiñtia Hills baroh kawei bad la ong ba ka daw bym pynbha ïa ki kot kali, kadei namar ka jingsniew ka kamai kajih, ka jingduh dewïong bad ka jingbym treikam ka ‘export’ bad ‘import’.
