Shillong, Jymmang 27
Ka Hynñiewtrep Youth Development Council (HYDC) ka la takraiñ tyngeh ïa ki trai dukan kiba leh Benami, kumjuh ruh ka la dawa ïa ka Sorkar ban pynduh noh ïa ki dukan jong ki haba kim lah ban pynïaid bad ban khot tender thymmai khnang ba kiba dei hok kin lah ban pynïaid ïa ki dukan.
Ïa kane la ong da u Working President ka HYDC u Bah Francis Sohtun haba kren sha ki nongthoh khubor hadien ka jingkhynra bad lap ba kiba bun ki dukan hapoh ka Meghalaya Urban Development Authority (MUDA) kiba shong dukan ki dei ki mynder, hynrei kiba shah kyrteng pat ki dei da ki Khasi.
U la ïathuh ba na ki 60 tylli ki dukan ba ka seng ka la leit ban pynlong ka jingpeit bniah ïa ki kot ki sla, ka lap ba tang 3 tylli ki dukan kiba shong da kiba dei shisha katkum ka thup kyrteng ba la ïoh RTI na ka tnad ba dei peit.
Shuh-shuh u la ong ba ka daw jong kane baroh ka dei namar ba ki briew kiba ïoh ïa ki dukan lyngba ka tender ha MUDA ki kwah pisa suk palat, da kaba ki aiwai pateng sha kiwei pat ki briew bad kane ka rukom leh ka pynduhnong ïa ki briew kiba smat bad kiba lah shisha ban pynïaid ïa ki kam khaïi.
Namar kata u la kyntu ïa ka Sorkar ba kan pynduh dukan noh ïa ki briew kiba aiwai pateng kumjuh ba kan ai da ka tender ba thymmai, khnang ba kin ïohlad kito ki briew kiba lah ban pynïaid hi dalade ïa ki dukan bad ba kan long ka jingai kam ai jam ïa ki Khasi ha kum kane ka pyrthei kyrduh kam jong ki khun samla.
