Shillong, Jymmang 27
Da ka jingsngewkhia ïa ka jingïoh ‘Trading Licence’ ki briew kiba wan nabar ban pyntrei ïa kiba bun ki jingtrei ba hapoh ka Jylla, ka Meghalaya Alliance of Contractors & Suppliers Welfare Association (MAC&SWA) ha ka sngi Balang ka la phah tukar ïa u Chief Executive Member (CEM) jong Khasi Hills Autonomous District Council haba ïadei bad kane.
Ha ka jingïakynduh ïa u CEM, ka Association ka la kyrpad ïa ka KHADC ba kan shimkhia halor ka jingai ‘Trading License’ khamtam ha ki bynta kiba ïadei bad ki ‘Tender’ kiba ki nongtrei kontraktor trai ri trai muluk ki la lah ban pyntrei.
“Ka Association ka ngeit ba dei ban ai jingïada bad jingïarap shwa ïa ki trai Jylla khnang ba kin ïoh bynta ha ki kam kontrak bapher-bapher.”
Ka Association ka la ban jur ruh ba ki bynta kum ki kam pynpoi mar ha ka Jylla, ki jingtei kiba rit bad kim kam kiba rit, ka dei ban ailad shwa ïa ki kontraktor trai ri trai muluk, namar kane ka long ka jingïarap ban kyntiew ïa ka ïoh ka kot, jingïohkam bad jingkiew ka Jylla ha ka ïoh ka kot. Ka Association ka la kyntu ruh ïa ka KHADC ban thaw ïa ki lad jingïada kiba kham skhem halor ka jingpyntreikam ïa ka ‘Trading by Non-Tribals Regulation Act’ bad ban peitngor ba ki trai ri trai muluk kin ym shah kyntait ne shah knieh noh ïa ki kam kiba ki la lah ban trei.
Ka Meghalaya Alliance of Contractors and Suppliers Welfare Association ka pynpaw ïa ka jingkmen halor ka jingïoh por ban ïakren ïa u CEM bad ka kyrmen ruh ba ka KHADC kan shimkhia ïa kine ki jingkyrpad na ka bynta ka bha ka miat jong ka imlang ka sahlang bad ka roi ka par jong ka Jylla baroh kawei.
