Jowai, Jymmang 27
“Ngam ju kren pyrshah ïano ïano ruh hynrei nga kren beit tang na ka bynta ka roi ka par. Nga kwah ban weng ïa ka jingbishni, jingkynshoit, ka jingbitar bad ban kren da ka jingjai jai bad jingieid para briew,” la ong u kyrtong ka NPP u Dr. DRL Nonglait ha ka jingïalang ïalap ilekshon kaba la long ha Chilliangraij ha ka janmiet ka 25 tarik Jymmang.
Ka jaidbynriew ka donkam kyrkieh ïa u MP uba sngewthuh ïa ki mat jingdawa kynthup naduh ka jingpynkylla dur ïa ka pule puthi naduh ka kyrdan Lower Primary haduh ka Higher Secondary ban kyntiew ïa ka Higher & Technical Education kata ïa ki College, ki Medical College, ki Engineering College bad State University, la ong u Dr. Nonglait.
Na ka bynta ka Ktien ba kan ïoh ïa ka jingithuh da ka Riti Synshar ka Ri, u Dr. Nonglait u la ong, donkam ïa u briew uba tip ïa ki theory bad ka rukom long ka ktien khnang ba yn lah ban wanrah ïa ki jingshisha bad ki ‘data’ ne jingthoh hakhmat ka Ministry of Home Affairs bad ka Parliament.
“Kum u nonghikai Criticism, nga kdew ïa kaba dei bad ïaroh lada ka Sorkar lane kino kino kiba leh ïa kaba dei. Haba nga pyrshang ban kdew ïa ki jingduna kiba dang donkam ban pynbiang nga ïoh pynban ka kyntien na ki nongïalam jong ka party kiba ong dei na kata ka daw ba ngi donkam ïa phi. Kumta kala pynlong ïa nga ban sngewthuh ba kine ki nongïalam ki pdiang ïa ki jingai jingmut,” u la ong.
U la ong, ka jingwan ban pynïasoh bad ka NPP ka long hadien ka jingpeit bniah ba kane ka Sorkar ka don ïa ka mon ban weng ïa ki jingeh kiba la pyllang da hadien kawei pat ka Sorkar ha kine ki phew snem kiba la dep.
U la ïathuh ruh haba u la ïoh ïa ka phone call na u Myntri Rangbah ka Jylla bad kumjuh ruh ka jingïakren bad u Symbud Myntri Rangbah, u la pynshong dor pynshong nia bad pyrshang ban pan buit pan jingmut na ki briew kiba khamstad kham shemphang bad ha kajuh ka por na ki samla pule bad kiwei ki kynhun kiba ju ïatreilang na ka bynta ka bha ka miat jong ka imlang sahlang.
“Ka jingthmu jong nga haba nga wan ban pynïasoh bad kane ka party bad ban rung sha ka jylli saiñ hima sima, ki long halor ki kyntien phira: ban pynbha pynshai bad ban tei”, la ong u Dr. Nonglait.
U Dr. Nonglait u la kren ruh halor jinghiar ka longbriew manbriew, ki jingdawa ba donkam ban ïarap ïa ki samla kiba don hapdeng ki jingduh jingkyrmen kiba noh arsut ha ka jingmut jingpyrkhat, kiba kulmar namar ka jingkyrduh kam kyrduh jam, ka jingbym don ki lad ki lynti ban ïeng ha la ki jong ki kjat.
Ban weng ïa kitei ki jingeh u pynpaw ïa ka jingdonkam ban ïoh ïa ka Sorkar kaba trei bad kaba khlain hynrei hapdeng kita yn ym lah ban weng ïa ki jingeh mar mar.
“Kumba nga la ong da ki phew snem la pyllang ïa ki jingeh hynrei kito ki jingtreikam ka Sorkar kaba mynta ki long ki sakhi ba shai ba kane ka Sorkar ka don ïa ka mon ban weng ïa kine ki jingeh”, u la ong.
Halor ki jingkynnoh ïa ka Sorkar, u Dr. Nonglait u la ong, “Nga sheptieng ïoh ba ki paidbah ki sngap ïa ki jingpynbiej, ki sngap ïa ki jinghikai ba bakla ba kane ka Sorkar ka long kaba kumne kumtai. Hooid ki lah ban don hangne hangtai ki jingthut jingdkoh ha ka jingpyntreikam ïa ki skhim bapher-bapher ïa kita yn ym lah lait, kin don beit ki jingduna, hynrei kaba donkam ka long ban pynbha”.
“Nga sheptieng ïoh ba lada wan da kawei pat ka Sorkar, ki project surok kiba ngi ïohi mynta ki long kiba bha, yn nym lah wat tang ban maramot shuh ïa ki. Ki jaka pule kiba la plie ha kine ki snem kiba mynta kiba kane ka Sorkar kala thung kum ki maw mer kiba thymmai lada ngim ïoh ïa ka Sorkar kaba khlaiñ yn ym lah lehse ban pynïaid ïa ki shakhmat”, u la ong.
U la kdew ruh halor ka jingdonkam ban pynkhlain ïa ka Shillong Medical College, Shillong Engineering College bad ka State University khnang ba kin ïaryngkat dor bad kiwei ki University bad Institution kiba bha tam hapoh ka ri India.
“U CM un hap ban bunkam ban leit dalade sha Delhi lada ym ïoh ïa u MP uba ïatreilang bad ka Sorkar, bad kata kan dkoh shibun ïa ka jingtreikam jong ka jylla”, ong u Dr. Nonglait bad bynrap ba na kata ka daw u wan ban kyrpad ïa ki paidbah ban bteng ka jingïatreilang bad kane ka Sorkar.
U la kdew ruh halor ka jingdonkam ban pynneh pynsah ïa ka riti dustur, ka bor ki shnong bad Elaka, ki raij bad hima, kiba long ka jinglong kyrpang kaba ym dei ban duh, bad ba ki District Council kim dei ban mushlia palat ïa ki shnong ki thaw, ki bor Elaka namar ki long ki bor kyntang ba la buh da ki longshwa manshwa.
