Shillong, Jymmang 27
Ka Myntri Khynnah ka Sorkar Pdeng ka tnad Youth Affairs & Sports, ka Raksha Nikhil Khadse ha ka Sngi Balang ka la khmih bniah ïa ka jingpyntreikam jong ki skhim ba la kyrshan da ka Sorkar Pdeng ha ki tnad Sorkar bapher-bapher ha East Garo Hills bad kyntu ïa ki ophisar ban pyntikna ba ki jingmyntoi ki poi sha man la ki longïing.
Ka jingïalang khmih bniah ka kynthup ïa ki skhim kiba hap hapoh ka Public Works Depart-ment, Animal Husban-dry & Veterinary, Housing, Fisheries, Soil & Water Conservation, Health, Social Welfare, Water Resources, C&RD Blocks, Planning, Sports, Tourism, bad kiwei-kiwei.
Haba khmih bniah ïa ka jingtyllun jong ki kam ki jam, ka Myntri ka la ban jur na ka bynta ka jingaiti kaba kham khraw na ki ophisar.
“Trei da ka jingaiti lut khnang ba ka jingmyntoi kan poi sha man la ki thliew ïing,” la ong ka Khadse.
Ka la pynpaw ruh halor ka jingdonkam ban buddien na ka por sha ka por ïa kine ki skhim.
“Ka donkam ban khmih bniah ïa ka jingpyntreikam jong ki skhim ha ka por kaba biang khnang ban pynneh ïa ka jinglong khuid,” ka la bynrap.
Ki heh ophisar ka distrik ki la ai ïa ki kaiphod halor ka jinglong-jingman jong ki projek kiba dang ïaid shakhmat bad pynpaw ruh ïa ki jingeh ha ka ban pynpoi ïa ki jingmyntoi ha ka bynta ba khatduh.
Na ka liang ka Myntri, ka la bthah ïa ki tnad treikam ban pynsted ïa ki kam kiba dang sahteng bad ban pynkhlaiñ ïa ka jingïatreilang khnang ban lait na ki jingpynslem.
