Nongstoiñ, Jymmang 27
Uwei u rangbah uba la don kumba 65 snem ka rta, u la mynsaw jur hadien ba hap u sainar bording kaba la jia ha ka shnong Nongdiwah, West Khasi Hills.
Ïa une u rangbah uba la mynsaw ha katei ka jingjia uba dei ruh u kpa ka ïing la tip kyrteng u Bah Savio Marngar, bad katei ka jingjia kala jia myn ha ka miet jong ka 25 tarik mynta u bnai ha ka por kumba 9 baje eiei bad hadien katei ka jingjia mar mar la pynkit noh ha Woodland Hospital Shillong bad mynta u don hapdeng ka jingshah sumar ha ICU. Halor kane ka jingjia, ka Hynñiewtrep Youth Council (HYC) Umyiap Area Unit ha ka sngi Balang ha ka jingïalam u samla Olivertwist Marngar ryngkat ka jingsynran u samla Redyfernandy Sun President HYC Nongstoiñ Circle bad samla Lumlang Kharsyiemlieh President HYC WKHD, kala ïoh ban leit ïakynduh ïa u SDO MePDCL Nongstoiñ West Khasi Hills District ban kyrpad ban ai jingïarap ïa u Bah Savio Marngar hadien ba u sainar bording u la hap hajan ba u ïeng ha kaba u la mynsaw jur.
Ki nongïalam ka HYC ki la ong ba ka seng ka kyrpad ban pynkynriah noh ïa ka line na ka ïing jong ki ban lait ka mynsaw biang. La ong ruh ba halor kane ka bynta, u SDO u la kular ban pynkynriah noh khyndiat ban lait ïa ka phyllaw jong ka ïing.
