Ngi hap shah thngan namar ngim nud shuh ban leit rep, ong u Waheh Shnong Lapangap

Shillong, Jymmang 27

Ka jingbun ki pulit Assam ryngkat ki paidbah Karbi ban pahara ïa ka jaka rep jong ki Lapangap ka la pynlong ïa ki nongshong shnong ban nym nud shuh ban leit rep namar lada ki leit rep ki la shah siat da ka jri ha ki nongshong shnong jong ki Karbi.

Haba ïakren bad u Bah Deimonmi Lyngdoh uba dei u Waheh Shnong ka Lapangap ha West Jaiñtia Hills District u la ïathuh ba ka shnong ka la rai ban nym leit rep shuh namar da ki leit ki shah siat da ka    

jri, kumta ki la shaniah beit ha ka jingstad ka Sorkar Jylla ba kan leh ïa kaba donkam.

U la ïathuh ba naduh ka 18 tarik mynta u bnai, ki pulit Assam ki don beit kumba sanspah ngut ban wan pahara ha jaka rep ki nongshong shnong Lapangap ban synran ïa ki nongshong shnong Karbi kiba la ap ktem ban siat ïa ki nongrep na Lapangap.

U la ïathuh biang ba ki pulit Assam man ka sngi ki la wan ap pahara naduh dangstep ha ki jaka rep ki nongshong shnong Lapangap bad ha ka por janmiet ki la leit phai katba ki pulit Meghalaya ki shong beit ha jaka sah ha Lapangap. Shuh shuh u la ïathuh ba ki pulit Meghalaya ki don tang kumba 60 ngut bad dei na kane ka daw ba ki nongrep ki hap ban kynrandien noh namar ban ïaleh bad ki pulit Assam kim nud. U Bah Deimonmi u la ïathuh ba ki pulit Assam ki shu wan pahara hynrei kim leh eiei lada wan rep ki nongshong shnong hynrei ki tieng ïa ki Karbi kiba wan siat da ka jri kiba ap pahara man ka sngi.

“Ngin hap ban shah thngan noh lada ngim ïoh shuh ban rep”, ong u Bah Deimonmi.

 U la ïathuh ba ha ki por mynshwa ka shnong Lapangap ka jingheh u pud u sam kumba san kilometre shaduh Karbi hynrei naduh ba ka Assam ka la knieh ïa u Doloi jong ka Labang Nongphyllut Elaka ka la klun lut ïa ka Block-1.

U la pyntip ruh ba ka shnong ba don markhap bad ka Lapangap ka dei ka Tahpat hynrei kane ka shnong kaba hap ha Shilliang Myntang Elaka kaba mynta ka don ha Karbi Anglong kam lah ban shim rai namar ka rai ka la hap ha ka Socheng-Amreng Border Development Committee (SABDC) kaba pynkhih ïa kane ka kam khappud.

U Bah Deimonmi u la pyntip ruh ba ka jingmih ka jingïaknieh jaka ka dei na ka jingleh donbor ka Karbi Anglong Autonomous District Council.