Mumbai, Jymmang:
Na ka jingkhmih bniah, la ong ba ka jylla Maharashtra ka la paw kum ka jylla kaba bun tam ki kam runar pyrshah ïa ki khynnah ha ka ri, ha kaba ka la ïoh 24,171 tylli ki kam runar ha u snem 2024, katkum ka jingkheiñ ba thymmai jong ka National Crime Records Bureau (NCRB) kaba la bishar bniah da ka Child Rights Organisation Child Rights and You (CRY).
Ka jylla ka la pynpaw ruh ïa ka jingdon jong ki kam rahbor bad jingshah rahbor kiba ïadei bad ki khynnah rit kiba bun tam haduh 12,994 ngut, kaba long kaba heh tam ha baroh kawei ka ri India. Haba phai sha ka jingdon ki kam runar ha ka shi lak ngut ki khynnah, ka Maharashtra ka wan ha ka kyrdan kaba ar da 66.9, hadien ka Madhya Pradesh.
Ki jingtip ba la ïohlum ki pynpaw ïa ka jingsngewkhia na ka bynta ka jingshngaiñ jong ki khynnah ha ka jylla, khamtam eh ïa ki khynnah kynthei.
Na ki 3,495 ngut ki khynnah ba la ïoh jingtip ba ki la jah ha Maharashtra ha u snem 2024, ki khynnah kynthei ki don 2,057 ngut (57.1%).
Ka jingdon jong baroh ki khynnah kiba jah ka long 5,540 ngut, kynthup ïa 3,165 ngut ki khynnah kynthei.
Wat hapdeng kine ki jingeh, ka jylla ka la lah ban wad bad ïoh biang ïa ki 3,737 ngut ki khynnah, kynthup ïa ki 2,123 ngut ki khynnah kynthei, da kaba ïoh jingkheiñ ha ka liang ka jinglah ban pynbha pat da 67.5 percent. Hynrei ki don 1,803 ngut ki khynnah, kynthup ïa ki 1,042 ngut ki khynnah kynthei, kiba dang sah khlem pat lap ha kaba kut jong u snem 2024.
Ha ka ri baroh kawei, ki kam runar pyrshah ïa ki khynnah ki la kiew sha ka 1,87,702 tylli ha u snem 2024, ka jingkiew kaba khraw haduh 110 percent naduh u snem 2014.
Ki jingjia ba jah jong ki khynnah ha kylleng ka ri ki la kiew sha ka 1,47,175 tylli, ha kaba ki khynnah kynthei ki long 75.6 percent na ka jingkheiñ baroh.
Ka Kreeanne Rabadi, kaba long ka Regional Director, CRY – West, ka la ong, “Ka la dei ka por ba ngi donkam ban bishar bniah bad pynkhlaiñ ïa ki rukom peitngor bad aiñ kiba la don lypa jong ngi. Ka jinglah ban ai jingïada ïa ki khynnah kynthei ka long ka bynta kaba hap ban buh hakhmat eh ha ki khyndiat snem ba la leit hynrei ka jingkiew jong ki kam runar pyrshah ïa ki ka la nang kiew arshah.”
Ka la ban jur ïa ka jingdonkam ban don ka jingïatreilang kaba kham bha hapdeng ka sorkar bad ki seng bhalang ban ai ka jingïada ïa ki khynnah kynthei bad shynrang.
Ka jingbishar bniah jong ka CRY ka la khot ïa ki lad wad bniah kiba kham khlaiñ, ka jingïatreilang kaba kham bha hapdeng ki jylla, ki jingtohkit kiba kham stet, bad ki jingïarap kiba pynleit jingmut, khamtam eh na ka bynta ki khynnah kynthei kiba dang samla, ban weng ïa kane ka jingeh kaba nangroi.
Ha ka jinglong kaba pynkulmar jingmut, khyndai tylli na ki 10 tylli ki kam runar pyrshah ïa ki khynnah ha India ki dei kiba kynthup ïa ka jingpynmih ne pynsaphriang ïa ki jingthoh kiba pynsngewsih ïa ki kam shongkha shongman, katkum ka jingkheiñ ba thymmai jong ka National Crime Records Bureau (NCRB) na ka bynta u snem 2024.
Ka kaiphod jong ka NCRB ka pynpaw ïa ka jingkiew kaba jur jong ki kam runar pyrshah ïa ki khynnah wat la ka jingdon jong ki kam runar baroh kawei ha ka ri ka la hiar. Ha u snem 2024, la buh jingthoh haduh 1,87,702 tylli ki kam runar pyrshah ïa ki khynnah ha kylleng ka ri India, kaba kiew da 5.8 per cent na ka 1,77,335 tylli ha u snem 2023.
Ha kine ki saw snem ba la dep, ki kam runar pyrshah ïa ki khynnah ki la kiew da palat 46 percent, na ka 1,28,531 tylli ki jingjia ha u snem 2020 sha ka 1,87,702 tylli ki jingjia ha u snem 2024. Haba ïanujor, ki kam runar baroh ha India ki la hiar haduh 10.8 percent ha kajuh ka por.
