Shillong, Jymmang 27
U Superintendent of Police (SP) ka West Garo Hills Abraham T Sangma ha ka sngi Balang u la ïathuh ba tang kawei ka case la register pyrshah ïa u MLA barim ka Phulbari SG Esmatur Mominin halor ka jingjia ha ka 9 tarik Lber ha Chibinang bad ïa ka ejahar u MDC ka BJP na Tura Bernard N Marak la shim kum ka ujor bynrap ïa ka case bala don lypa.
Ha ka kyrwoh, u Abraham u la ong ba ka jingpynshai ka long kaba donkam “khnang ban kiar na kino-kino ki jingsngewthuh bakla ne kulmar jingmut halor ka jingregister ïa bun tylli ki ejahar haba ïadei bad kajuh ka jingjia bad ban pyntip ruh ïa kane sha ki paidbah ha ka rukom kaba dei”.
Katkum ka jingong u SP, ka joint FIR la mudui ha ka 18 tarik Lber, 2026 da ki Nongïalam ka GSU Chibinang bad Phulbari Regional Unit. “Ha ka 18 tarik Lber 2026, ka joint FIR la mudui da u Joint Secretary ka GSU Chibinang, Regional Unit bad General Secretary ka GSU Phulbari, Regional Unit, West Garo Hills pyrshah ïa u SG Esmatur Mominin, MLA barim ka Phulbari Constituency, ba ïadei bad ka jingkynnoh kam bymman kaba jia ha Chibinang ha ka 9 tarik Lber, 2026”, ong u Abraham.
Ka ejahar ka kynthup ïa ka jingkynnoh ba ïadei bad ka jingpynpra ïa ka ophis ka GSU bad u mot ha ïew Chibinang, u la ong.
Halor kane ka ejahar, ki pulit ka Phulbari kila register ïa ka case No. 12/2026 hapoh ka kyndon 189(2)/191(1)/192/196(C)/57/353(2)/298/324(4)(5) jong ka BNS, 2023, pule lang bad ka kyndon 6/6A/8/8A jong ka Meghalaya Maintenance of Public Order Act, ong u SP.
“Halor kane, la kem ïa u nongshah kynnoh bad ka jingtohkit ïa kane ka kam ka dang ïaid shakhmat”, u la ong.
Halor ka ejahar jong u MDC Bernard N Marak, u Abraham u la ong, “Ha ka 14 tarik Ïaïong, 2026, ka shithi ujor ba ïadei bad kane kajuh ka jingjia la ïoh pdiang ha kane ka ophis na u Bernard N Marak, MDC, Tura. Ha ka 16 tarik Ïaïong, 2026, ïa kane ka shithi ujor la phah sha u Officer In-charge ka thanad Phulbari ba un leh ïa kaba donkam”.
U la batai ba ym shym la register ïa ka ejahar la ka jong. “Naba baroh ki ejahar bad ka ujor ki ïadei bad kajuh ka jingjia bad ki jingshisha, ïa kane ka shithi ujor bala aiti da u Bernard N Marak la shim kum ka ujor bynrap haba ïadei bad ka case bala dep register lypa ha thanad Phulbari”.
Haba sot ïa ka ïingbishar Supreme Court, u SP u la bynrap, “Katkum ki kyndon aiñ bala buh da ka ïingbishar Supreme Court ha ka TT Antony vs State of Kerala & Others (2001) 6 SCC 181, bun tylli ki ejahar bad bun tylli ki kam bymman ym lah ban register la ka jong haba ïadei bad kajuh ka jingjia”.
U Abraham u la pynthikna ba baroh ki jingtohkit haba ïadei bad kane ka jingjia la leh hapoh ka case bala register katkum ki kyndon ka ain bad ki lynti bala buh da ka ain.
