Shillong, Jymmang 28
Ka Centrepoint Group ka pynrem jur ïa ka jingjia kaba sngewsih bad pynkyndit mynsiem jong ka jingwan rung jubor, ka jingïaumsnam bad ka jingthombor kaba la jia ha ka sngi Palei jong ka taïew, ha ka Shnong Laitkynsiew, ha ka jaka ba dang shna ïa ka resort project.
Ha ka kyrwoh ba la phah da u Bah Larsing Sawyan, Managing Director Centrepoint Group Enterprise u la ong “Ha ka por kumba 2:45 Pm, ka kynhun kaba don kumba 15 ngut ki samla, kiba kam ïalade ba ki dei na ka KSU ki la wan rung khlem jingbit sha katei ka project site bad sdang ban byrngem bad thombor ïa ki nongtrei kiba don ha katei ka jaka. Ha kane ka jingjia bun ngut ki nongtrei ki la mynsaw jur, katba u wei u carpenter, u Rajkumar Sharma, u la mynsaw jur ha ka khlieh bad mynta u dang shah sumar ha hospital.
“Ngi sngewkhia jur halor kane ka kam thombor bad kam be-aiñ,” u la ong ha ka kyrwoh.
Ka Centrepoint Group, ka sngew sarong ba ka long ka hospitality brand kaba la mih na Meghalaya bad kaba la tei ïa la ka kyrteng bad ka nam ha kylleng ka ri lyngba ka jingtrei shitom, ka jinglong paidbah bad ka jingaiti lut ha ka jingtrei bha. Kum kawei na ki kynhun hospitality bad infrastructure ba hakhmat eh ha Meghalaya, ngi la trei shitom ban thaw ki lad jingïohkam, kyntiew ïa ka kam jngohkai bad ban wanrah ïa ki jingtei kiba paka bad kyrpang kiba wanrah burom bad jingïohnong ïa ka Jylla bad ki paidbah jong ka, la ong u Bah Larsing.
U la ong ruh ba ki hospitality bad allied business jong ngi ki kyrshan ïa ka jingïohkam bad ka jingïoh jingïarap jong bun bah ki longïing ha ka Jylla. Kum ka Group, ngi don palat 680 ngut ki nongtrei ha ka payroll jong ngi bad ngi sngew sarong ban long hapdeng ki employer shnong kiba heh tam ha ka Jylla, katba ngi dang bteng ban bei tyngka bad seng ïa ki projek na ka bynta ka lawei jong ka Meghalaya.
“Ngi ïohi ïa kane ka jingthombor ym tang kum ka jingshah ktah jong kawei ka business hynrei kum ka jingpynkheiñ ïa ki hok paidbah jong u paidbah nongshong shnong ka ri India, ka hok ban im ha ka jingshngaiñ, jingïohkam, burom bad jingïada hapoh ka aiñ,” u la ong shuh shuh.
Nalorkata, u la ong ba ka jingthombor ïa ki local business kiba la pyni ïa ka jinglah ban thaw kam thaw jam bad ban wanrah jingtei ha ki thaiñ nongkyndong ka jylla, kadei ruh ka jingthombor ïa ka jingkiew shaphrang bad ki jingangnud jong ki paidbah ka Meghalaya. Kum kine ki jingleh ki pynslem bad pynpra ïa ki jingïaid shaphrang jong ka Jylla sha ka roi ka par kaba neh bad kaba paidbah.
U la kdew ruh ba kane ka jingjia ka pynjah burom jur ïa ka dur bad ka lawei jong ka Meghalaya. Kum kine ki kam ki pynsangeh ïa ka jingwan bei tyngka, ki pynlong ïa ki nongtrei ban sheptieng bad ki pynduh ïa ka lad kaba heh jong ka Jylla, khamtam ha ki thaiñ nongkyndong kiba dang duna ka roi ka par, kiba dang bun ki paidbah kiba im ha ka jingduk bad kiba donkam jur ïa ki lad jingïohkam.
“Ki paidbah ka Meghalaya ki long kiba la tip paidbah da ka jingïalong jingïadei paralok, ka jingsngewbha bad ka jingïohi jngai. Ngi kyntait ban ngeit ba ka jingïaumsnam, ka jingïabom paidbah bad ka jingthombor ki mih na ka mon jong ka imlang sahlang jong ngi. Ka roi ka par, ka tourism bad ka jingïoh jingïarap ka Jylla ki lah ban roi tang ha ka jingïalong jingïasuk, jingshngaiñ bad jingïaburom markylliang,” u la bynrap.
“Ngi kyrpad ïa ki bor Sorkar ban shim mardor ïa ki sienjam kiba tyngeh pyrshah ïa kiba donkti bad ban pynthikna ïa ka jingshngaiñ jong ki nongtrei bad ki project site ha kylleng ka Jylla,” u la ong.
Namarkata u Bah Larsing u la kyrpad ruh ïa baroh ki paidbah ka Jylla ban mih shakhmat, ban pynrem ïa kum kine ki kam thombor, namar kine ki kam ym tang ba ki pynslem ïa ka roi ka par hynrei ki buh jingma ruh ïa ka jingshngaiñ jong ngi hi, kiba trei bad pule shabar ka Jylla.
