Khliehriat, Jymmang 28
U Myntri Rangbah ka Jylla Conrad K Sangma ha ka sngi Palei u la buh ïa u mawnongrim jong ki project shna surok ba kynthup, 3 tylli ki project ha madan ïalehkai Latyrke, East Jaiñtia Hills ba shongdor kumba T.412 klur.
Ka project 1: Jingjrong = 58.1 kms ba shongdor T.355 klur. Ka Nongbei pisa: EAP (World Bank)-Megha-laya Logistic & Connec-tivity Improvement Project (MLCIP). Part 1 jong ka project ka kynthup ïa ka jingpynheh ïa ka surok Dkhiah-Sutnga-Saipung-Pala haduh-Semmari na ka 30.10 km ha ka 58.10 km (jingjrong=28 kms).
Ka Project 2: Pynbha bad pynkhlain ïa ka surok Dkhiah-Sutnga-Saipung-Maulsei-Haflong (Ch. 43+200 to 52+000 km) [Length = 8.8 Kms] | ka dor jong ka Project ka long T.10.3 klur. Ka Nongbei tyngka: Central Road Infrastructure Fund (CRIF).
Project 3: Ka surok sha Kshaid Cympe na Siejrongheng nalor ka jingpynbha ïa ka surok Sutnga-Khaddum (jingjrong= 10.7+12+ 22.7 kms) bad ka dor jong ka project ka long = 46.75 klur. Ka Nongbei tyngka: SIDBI Cluster Development Fund (SCDF) bad kawei ka project ha shnong Lumshyrmit, East Jaiñtia Hills ba shongdor T.76.43 klur kata ka dei ka Shkentalang (NH-206) sha surok Lumshyrmit ba kynthup ïa ka Jingkieng baheh ha Wah Myntdu, kaba pynïasoh ïa ka NH-6 ha Kongong bad ka dor jong ka project ka long T.76.43 klur ba 18.64 km, ka nongtei tyngka: NSEIDS.
Ha kane ka sngi, la ïadonlang u Symbud Myntri Rangbah Bah Sniawbhalang Dhar, MLA ka thaiñ Kong Santa Mary Shylla bad Bah Kyrmen Shylla, ki Waheh Shnong na Latyrke bad Lumshyrmit nalor ki heh ophisar ka tnad PWD (R&B) bad ki heh na ka bor district. Ka jingkynshew tyngka baroh lang jong kine ki saw tylli ki project ka long T.488 klur ba jrong 108.24 km ha East bad West Jaiñtia Hills.
Haba ai jingkren, u Myntri Rangbah u la pynpaw ïa ka jingkmen haba pynbna ïa ka jingbuh mawnongrim ïa ki project kiba heh bala bei tyngka da ka World Bank na ka bynta ka East Jaiñtia Hills bad ong ba kine ki project surok kin nang pynkhlain ïa ki lad pynïasoh ha ka thaiñ haba kyntiew ruh ïa ki kam kamai kajih bad pynsuk ban ïoh ïa ki jingshakri kum ha ka koit ka khiah bad ka pule dangle.
Haba ïaroh ïa ka jingtrei shitom ka MLA ka thaiñ bad ka jingaiti lut sha ka constituency khamtam ha kaban ïasaid na ka bynta ki project surok, u Myntri Rangbah u la pynbna ba ïa ka tender jong kine ki project surok la dep ban khot bad la khmih lynti ba ki kam kin sa sdang noh hapoh ka 45 sngi.
U Myntri Rangbah u la aiksai ruh ïa ki jingtei kiba heh bad ki project lad pynïasoh ki ban sa pyntreikam ha ka thaiñ hynrei u la ban jur ïa ka jingkongsan ban shim ïa kiei kiei kawei hadien kawei bad ban pynïadonbynta lang ïa baroh ha ka kam ban shim rai.
Haba kren halor ka jingkhang tih dewïong kaba la ktah jur ïa ka kamai kajih ha ka thaiñ, u la ong, “Ka Sorkar kala trei khlem sangeh ban weng noh ïa ka jingkhang tih dewïong bad ka jingsdang tih dewïong katkum ka juk saian” bad ban jur ïa ka jingkut jingmut ka Sorkar ban pyndep ïa ki jingdonkam katkum ki aiñ ba ki lynti ba dei ban leh haba kyrshan ïa ka kam tih par.
Halor ka jingkyrshan ïa ki nongtih par kiba rit ba ria bad ban weng ïa ki jingeh ba ki mad, u Myntri Rangbah u la ong, “Ka jingïakren bad ka Sorkar India ka dang ïaid ban pynthikna ïa ka rukom tih par kaba neh” bad ban jur ïa ka jingkongsan ban pynbiang tarajur ïa ka jingdonkam ki nongtih par kiba heh bad kiba rit ban lah kynjoh ïa ka jingïai neh kaba slem. U la pynpaw ïa ka jingkyrmen ban shem ïa ki lynti ki ban pynmyntoi ïa ki nongtih par bad ka mariang.
U Myntri Rangbah u la pynbna ïa ka jingkyrshan ban tei ïa ka Indoor Stadium ha Latyrke kumba angnud da ki nongshong shnong jong ka thaiñ.
Ha shnong Lumshyrmit kaba la buh ïa u mawnongrim jong ka surok Shkentalang (NH-206) sha Lumshyrmit bad ka jingkieng ha Wah Myntdu, ba pynïasoh ïa ka NH-06 bad Kongong, u la pyntip ba kane ka project ka plie ïa shibun ki lad ïa ki trai shnong kynthup ki kam jngohkai, ka rep ka riang bad ki jingdonkam ba man ka sngi kum ka pule dangle bad ki jingai jingsumar.
