Nongpoh, Jymmang 28
Hadien da ki phew snem ka jingïaid lynti, ka Elaka Nongpoh Sirdarship hapoh ka jingïalam u Bah Luistar Lyngdoh kum u Acting Sirdar mynta ka kynti kan sa ïoh noh ïa la ka shlem treikam kaba pura na ka bynta ban pynsuk ïa ki nongïalam ka Elaka ba kin pyntyllun ïa ki kam ki jam kiba ïadei bad ka synshar ka khadar ïa ki khun ki hajar. Ïa kane ka shlem treikam kaba thymmai, yn tei ha ka rukom kaba paka bad itynnad katkum kane ka juk stad kaba mynta.
Ïa u mawnongrim ban tei ïa kane ka shlem treikam ba pura ka Elaka Nongpoh, la wan ban buh da u Bah Sosthenes Sohtun, Myntri ka Sorkar Jylla ba dei khmih ïa ka tnad C&RD, GAD bad SAD ha ka sngi Balang ha Nongpoh marjan bad ki dukan Lay-by jong ka surokbah National Highway 6.
Nalor u Myntri Sorkar, ha kane ka sngi la wan ban ïadon ryngkat da u Bah Mayralborn Syiem MLA ka Nongpoh, u Dr. Celestine Lyngdoh MLA ka Umsning, u Bah Luistar Lyngdoh Acting Sirdar ka Elaka Nongpoh Sirdarship, ki Lyngdoh na ki Raid bapher-bapher lem bad ki Rangbah Shnong ka thaiñ.
Nalor ka jingbuh ïa u mawnongrim, ha kane ka sngi la ïoh ruh ban pyllait paidbah ïa ka ‘Blue Print’, kaba pyn-i kumno la mutdur ban tei bad pynwandur ïa kane ka shlem treikam kaba thymmai ka ban don kumba lai mala.
Kum shi bynta ban ai lang ïa ka kti ka mon, ka kti ka diang na ka bynta ban tei ïa katei ka shlem treikam ba pura ka Elaka Nongpoh, u Bah Sosthenes Sohtun u la kular ban ai jingïarap T.8 lak, u Bah Mayralborn Syiem T.5 lak bad u Dr. Celestine Lyngdoh u la kular ban ai T.3 lak.
Haba ai jingkren ha kane ka sngi, u Bah Sosthenes u la pynpaw ïa ka jingkmen ban sakhi lang ïa kane ka sngi kaba ka Elaka Nongpoh hapoh ka jingïalam jong u Bah Luistar Lyngdoh kum u Acting Sirdar, kala shim ïa ka sienjam ban don noh ïa la ka shlem treikam kaba pura hadien jong ki bun bun snem ki jingïaid lynti.
U Bah Sosthenes u la pynpaw ruh ba ka Elaka kala donkam shisha ban don noh ïa la ka shlem treikam kaba pura ba kan ïoh ban saiñdur ïa ka synshar ka khadar na ka bynta ki khun ki hajar kiba hap hapoh ka jingkhmih ka jong ka nalor ka jingpyntyllun ïa kiwei kiwei ki kam kiba ïadei bad ka Elaka bad na ka liang ka jong u, un dang pyrshang ruh ban wad shuh shuh ki lad ki lynti ban ïarap na ka bynta ban tei ïa kane ka shlem treikam kaba thymmai.
Kiwei pat kiba la ai jingkren ha kane ka sngi ki long u Bah Mayralborn Syiem bad u Dr. Celestine Lyngdoh bad kila ai khublei kyrpang ïa ki nongïalam ka Elaka khamtam ïa u Bah Luistar Lyngdoh kum u Acting Sirdar kiba la shim ïa kane ka rai rangbah ban tei noh ïa la ka shlem treikam kaba pura.
