Shillong, Jymmang 28
Ki trai jaka ha Lum Syrman, Elaka Nongkhlieh bad ki nongrep na ka shnong Shnongrim ha ka sngi Palei ki la ïoh ban aiti ïa ka dorkhas ha u Myntri Rangbah ka Jylla Meghalaya, Conrad K Sangma, ha ka jingïalang kaba long ha shnong Latyrke, East Jaiñtia Hills.
Ha kane ka dorkhas, ki trai jaka ki la pynpaw ïa ka jingeh bad jingïakhih jong ki halor ka jingthmu jong ka Shree Cement Limited ban khlong ïa u mawshun ha Lum Syrman, Elaka Nongkhlieh. Ki la dawa ïa ka Sorkar Jylla ba kan pynbeit shwa ïa ka jinglong trai ïa ka jaka bad ïa ki jingeh jong kiba shah ktah shuwa ban pynïaid shakhmat ïa ka Limestone mining project ne ban pynlong biang ïa ka Public Hearing.
Na ka liang jong ki trai jaka bad ki nongrep, ki kyrmen skhem ba ka Sorkar Meghalaya lyngba u Myntri Rangbah kan shimkhia ïa kane ka kam bad kan wad ïa ka jingïapynbeit kaba hok, kaba shai bad kaba wanrah ïa ka jingïasuk hapdeng baroh ki liang. Ki la ong ruh ba ka jingpynbeit shwa ïa kine ki mat ka long kaba donkam eh khnang ban lait na kino-kino ki jingïakynad, jingïakulmar bad ki jingjia ba sngewsih ha ka thaiñ.
