Shillong Jymmang 28
Ka United Democratic Party (UDP) ha ka 28 tarik u Jymmang, 2026, ka la pynbna paidbah da u nongïasaid aiñ ba pawnam ka Jylla, kata u Bah Vivanstone G. Kharngapkynta, kum u kyrtong ban ïa aireng ha ka ilekshon MP shiteng samoi sha Lok Sabha na Shillong Parliamentary Konstitwensi.
Ïa ka kyrteng u Bah V.G Kharngapkynta la pynbna da u Bah Metbah Lyngdoh, President ka UDP kaba la pynlong ha ophis jong ka party, ha ka jingdon lang ki MLA, ki MDC, ki nongïalam ka seng bad ki paidbah nongkyrshan ruh kumjuh.
Lah ban kdew ka UDP kadei ka seng kaba saw hapoh ka Jylla, ban pynbna ïa ka kyrteng u kyrtong ban ïa aireng ha ka ilekshon MP shiteng samoi.
Kum ban shu pynkynmaw ka UDP ha ka ilekshon MP sha Lok Sabha ha u 2024, ka la sei ïa u Bah Robertjune Kharjahrin, kum u kyrtong ka party ha kaba u la ïoh 44,563 vote.
Haba kren sha ki lad pathai khubor, u Bah Metbah Lyngdoh, President ka party, u la ong ba ka party ka la jied ïa u Bah Vivan halor ki nongrim ba khlaiñ bha, kaba u lah ban mihkhmat ban ïasaid sha Ïingdorbar Thawaiñ ka Ri.
Haba kylli halor ka jingpynmih bujli ïa u kyrtong ha kane ka ilekshon shiteng samoi sha Lok Sabha, u Bah Metbah u ong, ba ka shong ha ka por bad mynta kaba donkam ka long, ban peit ïa ka jingkwah jong u paidbah. U Kyrtong ba ki pynïeng mynta um dei tang u kyrtong ka UDP, hynrei u dei ban long u kyrtong jong ki paidbah ka Konstiwensi baroh kawei.
U Bah Metbah u la kam ruh ba ka jingïoh vote ka UDP, ka la kiew kumba saw shah ïa kaei kaba ki la ïoh ha u snem 2024, bad kane ka pyni ba bun ki paidbah ki la wanphai biang sha ka party.
“Ha u 2024, ka ilekshon ka la long kum ka lyer kaba shu ïaid kumto, ha kaba ki paidbah khlem da sngewthuh ki la shu bud kumto. Hynrei ha u 2025, haba ngi la ïaid ban pynshai, ki paidbah kiba bun ki la ai jingkyrshan ïa ka party, ha kaba ka party ka la lah ban ïoh ïa ka jingjop bad ka jingkyrshan ki paidbah ha ki san tylli ki Konstitwensi bad ngi la jop haduh 5 ngut ki MDC,” u la ong.
Haba ïadei pat bad ka Regional Democratic Alliance (RDA), na ka liang u Bah Metbah u ong “Na ka por sha ka por, ka UDP bad HSPDP ka ju don ïa ka mynsiem ka jingïatreilang ryngkat, hynrei mynta ka kynti haba ïadei bad ka ilekshon MP, na ka liang ka HSPDP namar ba ka don ïa ki daw hapoh ka party hi, kim pat shym la lah ban ai ïa ka rai na bynta ka ilekshon MP la kin ïadon ryngkat ne-em”.
“Ka daw ba ka UDP ka pynbna noh ïa ka kyrteng u Bah Vivan, ka long namar ba ka por ka la dei bad ym long shuh ban ap bad ban nang pynslem. Ka party ka la ïaid shakhmat. Hynrei ka jingkhang ka dang plie bad ka dangap ïa ka rai ka HSPDP, la kan ai ka jingkyrshan ne em,” la bynrap u Bah Metbah.
Shuh shuh u la ong ruh ba ka UDP ka ieh ha ka rai ha ka HSPDP, ïa kaei ka bynta kaba kin shim bad kin sa ai jingtip kum ka party. “Ngi la ïaid shakhmat da ka jingïasngewthuh jingmut, hynrei ka jingkhang ka dang plie bad lada ki shim ïa kano-kano ka rai, ngin da sngewkmen eh ba kum kawei na ki party riewlum kiba don ha kajuh ka rynsan, ba kin shim ïa ka rai, ba kin ai ka jingkyrshan ïa ngi.”
