Khliehriat, Jymmang 28
Ka Jaiñtia National Council (JNC) 7-Shnong Circle ka pynpaw ka jingsngewkhia jur halor ka jingbuh jingma jong ki post ilektrik kiba la sarang ïa ki nongleit nongwan bad khamtam ïa kawei ka longïing kaba don marjan ha ka shnong Rangad, East Jaiñtia Hills.
Halor kane, ka seng hapoh ka jingïalam u Secretary Mehi Rymbai ka la leit ban ïakynduh ïa u Sub-Divisional Officer ka MePDCL ban dawa ban bujli noh mardor ïa kine ki post ilektrik kiba buh jingma.
“Ngi la dawa na u SDO ka MePDCL ban bujli noh khlem da pynslem shuh ïa kine ki post kiba la sarang ha ka shnong Rangad namar ki buh ka jingma kaba khraw ïa ki mynsiem briew,” ong u Bah Mehi hadien ka jingïakynduh.
Ka seng ka la ong ba kine ki post ilektrik ki la nangtroin bad sarang katba nangmih ki sngi ki snem bad kiba buh ka jingma ïa ki nongleit nongwan khamtam uwei u post uba don tang khyndiat mitar na ïing briew.
Na ka liang ki nongshong shnong ki la pynpaw ïa ka jingsyier ba kine ki post ilektrik ki lah ban khyllem noh ha ka por lyiur ne ha ka por ba jur lyer bad kaba lah ban pynlong ïa ki waiar ba kin hap sha madan bad buh jingma ïa ka jingim briew bad ki jingdon jingdem.
Ha kane ka jingïakynduh u SDO u la pynthikna ïa ka seng ba ka tnad kan shimkhia mardor ïa kane ka kam na ka bynta ka jingbha bad ka jingshngaiñ jong ki nongshong shnong.
Ka seng ka la ong ba kan bteng ban buddien ïa kane ka jinglong jingman bad ban buddien bad ka MePDCL ban pynthikna ba ka jingbujli ïa kine ki post ilektrik kan ïaid shakhmat khlem da pynslem shuh.
