Shillong, Jymmang 28
Ka State Executive Committee jong ka Voice of the People Party (VPP) ha ka jingïalang kaba la pynlong ha ka 25 tarik u Jymmang, 2026, ka la shim ïa ka rai ban pynlong ïa ka jingïaid paidbah bad ker sawdong ïa ka ophis treikam Secretariat.
Ka jingthmu leit ïakhih ka VPP sha Secretariat, kan dei hadien ba la dep ka eksamin jong ki khynnah pule.
Ka jingshim rai ka VPP ban pynlong ïa kane ka jingïakhih hadien ka eksamin, kadei namar ka jingkyrpad na ki khynnah pule bad na kiwei-kiwei pat, kiba la pynpaw ïa ka jingsngewkhia, ba ka jingpynlong ïa katei ka jingïakhih kan lah ban ktah ïa ki.
Ka VPP ka la pynpaw ruh, ba ka buh hakhmat ïa ka lawei ki khynnah pule bad kumta ka la shim ïa ka rai ban pynlong ïa ka jingïakhih bad ker sawdong ïa ka Secretariat, hadien ba la kut ka eksamin.
Lah ban kdew ba ha kine ki taïew bad ki bnai ba la dep, ka VPP hapoh ka jingïalam u Bah Ardent Basaiawmoit President, ha man la ki jingïalang, ka la byrngem ban tur sha Secretariat haba ïadei bad ki mat jingdawa jong ka seng, ba ka Sorkar ka dangsngap mynthi haduh mynta.
