Shillong, Jymmang 28
Ka seng ki nongthoh kot ka Jylla ka Khasi Authors’ Society (KAS) ka la pynshai haba ïadei kiba bun ki jingshah kynthoh, na ka jingjied u Dr. D.R.L. Nonglait ban long kum u kyrtong jong ka National People’s Party (NPP) ha kane ka ilekshon MP shiteng samoi.
“Ka Khasi Authors’ Society ka pynshai sha ki paidbah ba ka dei ka Seng ki Nongthoh kot Khasi kaba kynthup ïa ki dkhot kiba wan na ki jylli bapher-bapher. Ka dei ka seng kaba trei na ka bynta ban pynroi, pynïar bad kyntiew ïa ka ktien, ka kolshor bad thoh ka tar Khasi” ong ka kyrwoh khubor u Dr. R.P Kharshiing uba dei u General Secretary ka KAS.
Shuh-shuh ka seng ka pynpaw ba ka ju pynlong ïa ki prokram bapher-bapher ba kynthup ruh ïa ki jingïalang paidbah ha ki por ba donkam ban ai jingpynshai bad ban pan jingkyrshan haba dawa na ka Sorkar na ka bynta ban kyntiew ïa ka ktien Khasi. “Hooid u paidbah u la ai shisha ïa ka jingkyrshan baradbah bad ha ki taïew ba la dep, ka Sorkar ka la pynurlong ïa ka jingdawa jong ka Jaitbynriew kaba la dawa naduh u snem 2023 ïa kaba la lamkhmat da ka Khasi Authors’ Society” kata ka long halor ka jingpynlong ktien Sorkar (Official Language) ïa ka ktien Khasi ha ka Jylla Meghalaya.
La ong shuh-shuh ba ka KAS ka don shibun ki dkhot kiba don ha la ki jong ki jong ki sengsaiñ pyrthei (Political Party) kiba ki kyrshan bad ïakit ïabah ïa ka kam saiñpyrthei. “Don napdeng ki dkhot jong ka seng kiba la long ki MP, MLA, MDC bad kiba la bat ruh ïa ka kyrdan Myntri ha ka Jylla, Chief Executive Member ha District Council bad bun kiwei ki kam ba ki bat kum ki nongkitkam ha ka kam saiñ pyrthei.”
“Kine ki dkhot ki pynrung ïalade sha ka seng halor ka nongrim ba ka seng ka pdiang sngewbha ïa baroh ki nongthoh kot ban long ki dkhot jong ka shisien ba ki la thoh kot ha ka ktien Khasi bad khamtam haba ki don ka jingkitkhlieh ban pynkhlaiñ ïa ka thoh ka pule Khasi.”
Ka seng ka la pynshai ruh ba ym tang ba ki don ïa ki nongïalam ha ki seng saiñpyrthei kiba long dkhot hynrei ka don ruh ïa ki nongïalam niam na ki kynhun niam bapher-bapher, ki nongsynshar hima, nongïalam shnong bad ki nongtrei kam Sorkar. Nangta ki don ruh ki dkhot kiba trei ha ki kam bapher-bapher kum ki Doktor, ki nongïasaid aiñ, ki nonghikai skul, College, University, kiba trei kam lajong bad kiwei.
Ha kaba ïadei ka jingpynïaid kam ha ka Seng, kam don kano-kano ka jingkhanglad ïa uno-uno u dkhot naduh ki nongkitkam haduh kiba dang shu long dkhot ban pynïasoh ne rung sha kano-kano ka sengsaiñ pyrthei ne ka kynhun ha ka imlang sahlang. Kumta ka jingkynthoh pyrshah ïa ka KAS lane ïa ki dkhot da ki katto katne ki ‘riew shim kabu ka long ka kam pynthohbria ka bym don nongrim bad ki bym tip ruh ïa ka rukom treikam ka seng.
Haba bynrap ka kyrwoh khubor ka la pynshai ba ka jingpynïasoh u Dr. D.R.L. Nonglait sha ka party NPP bad ka jingthmu ban ïakhun ïa ka ilekshon MP shiteng samoi, ka dei ka rai shimet jong u bad kane kam don jingïasnoh eiei bad ka seng. Namarkata, ka jingjied jong u Dr. Nonglait, President KAS ka dei ka jingjied ba shimet jong u bad ha ka jingpynïaid kam ka seng la kdew shai ba ha ka jingbymdon u President, u Vice President u hap ban pynïaid ïa ki kam seng.
Namar kata kyntang ïawai ka KAS ka pynpaw ka jingsngewnguh sha baroh ki paidbah, ki sengbhalang bad ki seng trei mon sngewbha kiba la ju ai ka jingkyrshan met bad mynsiem ïa ka seng ha ki por baroh. “Ngi ïai khmih lynti ruh ba ki paidbah ka Bri u Hynñiewtrep kin ïai kyrshan ha ki sngi ki ban dang wan na ka bynta ban kyntiew ïa la ka ktien nongmei nongpa” la ong ka kyrwoh.
